નેશનલ સ્ટોક એક્સચેન્જ (NSE)ના પ્રસ્તાવિત IPOને માર્કેટ રેગ્યુલેટર સેબી (SEBI) તરફથી મંજૂરી મળી ગઈ છે. આ સાથે જ ગ્રે માર્કેટમાં NSE IPOનો GMP (ગ્રે માર્કેટ પ્રીમિયમ) વધીને 285 રૂપિયા પ્રતિ શેર પહોંચી ગયો છે. રોકાણકારોમાં આ IPOને લઈને ભારે ઉત્સાહ જોવા મળી રહ્યો છે.
રોયટર્સના રિપોર્ટ અનુસાર, NSE 21 સપ્ટેમ્બરથી શરૂ થતા સપ્તાહમાં શેરબજારમાં લિસ્ટિંગનું લક્ષ્ય ધરાવે છે. જોકે, આ માહિતી સૂત્રોના હવાલેથી સામે આવી છે. IPOની સંભવિત પ્રાઈસ બેન્ડ 1,800 રૂપિયાની આસપાસ હોવાની ચર્ચા છે. અનૌપચારિક બેઠકમાં મોટા સંભવિત રોકાણકારોએ આ ભાવે શેર ખરીદવામાં રસ દર્શાવ્યો હોવાનું કહેવાય છે.
NSE ભારતના ઈક્વિટી ડેરિવેટિવ્ઝ માર્કેટમાં પ્રભુત્વ ધરાવે છે અને કોન્ટ્રાક્ટ્સની સંખ્યાની દ્રષ્ટિએ વિશ્વનું સૌથી સક્રિય ડેરિવેટિવ્ઝ એક્સચેન્જ છે. તે નિફ્ટી 50 ઈન્ડેક્સનું સંચાલન પણ કરે છે. નાણાકીય વર્ષ 2026-27ના પ્રથમ ત્રિમાસિકમાં NSEએ આશરે 3,120 કરોડ રૂપિયાનો નેટ પ્રોફિટ નોંધાવ્યો હતો, જે ગયા વર્ષના સમાન ગાળાના 2,923 કરોડ કરતાં વધુ છે. ઓપરેશનલ રેવેન્યુ પણ વધીને લગભગ 4,560 કરોડ રૂપિયા થઈ હતી.