નેશનલ સ્ટોક એક્સચેન્જ ઓફ ઈન્ડિયા લિમિટેડ (NSE) એ તેના પ્રારંભિક જાહેર ભરણા (IPO) માટે ₹1ની મૂળ કિંમત (ફેસ વેલ્યુ) ધરાવતા દરેક ઇક્વિટી શેર દીઠ ₹1,700 થી ₹1,785ની પ્રાઇસ બેન્ડ નક્કી કરી છે.
કંપનીનો આ IPO સબ્સ્ક્રિપ્શન માટે 17 સપ્ટેમ્બર, 2026ના રોજ ખૂલશે અને 21 સપ્ટેમ્બર, 2026ના રોજ બંધ થશે. રોકાણકારો ઓછામાં ઓછા 8 ઇક્વિટી શેર માટે બિડ કરી શકશે અને ત્યારબાદ 8 શેરના ગુણાંકમાં બિડ કરી શકશે.
હાલમાં ₹1ની મૂળ કિંમત ધરાવતા 2,47,50,00,000 (2,475 મિલિયન) ઇક્વિટી શેર અસ્તિત્વમાં છે.
આ IPO શું છે?
આ IPO એ કોર્પોરેટ વેચાણકર્તા શેરધારકો દ્વારા 12,64,36,650 શેર સુધીના વેચાણની ઓફર (ઓફર-ફોર-સેલ) છે. આ શેરધારકોમાં સ્ટેટ બેંક ઓફ ઈન્ડિયા, કેનેડા પેન્શન પ્લાન ઇન્વેસ્ટમેન્ટ બોર્ડ, અરાન્ડા ઇન્વેસ્ટમેન્ટ્સ (મોરેશિયસ) પ્રા. લિ., એમએસ સ્ટ્રેટેજિક (મોરેશિયસ) લિ., ધ ન્યૂ ઈન્ડિયા એશ્યોરન્સ કંપની લિ., એસબીઆઈ કેપિટલ માર્કેટ્સ લિમિટેડ, બેંક ઓફ બરોડા, સ્ટોક હોલ્ડિંગ કોર્પોરેશન ઓફ ઈન્ડિયા લિમિટેડ, જનરલ ઈન્સ્યોરન્સ કોર્પોરેશન ઓફ ઈન્ડિયા લિમિટેડ અને યુનાઈટેડ ઈન્ડિયા ઈન્સ્યોરન્સ કંપની લિમિટેડનો સમાવેશ થાય છે.
આ ઇશ્યૂ SEBIના ICDR નિયમોને અનુરૂપ 'બુક-બિલ્ડિંગ' પ્રક્રિયા દ્વારા લાવવામાં આવી રહ્યો છે. જેમાં ક્વોલિફાઇડ ઇન્સ્ટિટ્યૂશનલ બાયર્સ (QIBs) માટે મહત્તમ 50 ટકા, નોન-ઇન્સ્ટિટ્યૂશનલ ઇન્વેસ્ટર્સ (NIIs) માટે ઓછામાં ઓછા 15 ટકા અને રિટેલ ઇન્ડિવિજ્યુઅલ ઇન્વેસ્ટર્સ (RIIs) માટે ઓછામાં ઓછા 35 ટકા હિસ્સો અનામત રાખવામાં આવ્યો છે.
NSE વિશે થોડું જાણીએ
NSEએ 1994માં તેની કામગીરી શરૂ કરી હતી. તે ભારતનું પ્રથમ એક્સચેન્જ હતું જેણે ઇલેક્ટ્રોનિક અથવા સ્ક્રીન-આધારિત ટ્રેડિંગ શરૂ કર્યું હતું. NSE પાસે સંપૂર્ણ રીતે સંકલિત બિઝનેસ મોડલ છે, જેમાં એક્સચેન્જ લિસ્ટિંગ, ટ્રેડિંગ સેવાઓ, ક્લિયરિંગ અને સેટલમેન્ટ સેવાઓ, ઇન્ડેક્સ તથા માર્કેટ ડેટા ફીડ્સનો સમાવેશ થાય છે.
NSE ટ્રેડિંગ અને ક્લિયરિંગ સભ્યો તથા લિસ્ટેડ કંપનીઓ દ્વારા SEBI અને એક્સચેન્જના નિયમોના પાલન પર પણ દેખરેખ રાખે છે. કંપની ટેક્નોલોજીના ક્ષેત્રમાં આગળ પડતી છે અને નવીનતાની સંસ્કૃતિ તથા ટેક્નોલોજીમાં રોકાણ દ્વારા તેની સિસ્ટમની વિશ્વસનીયતા અને કાર્યક્ષમતા સુનિશ્ચિત કરે છે.
ફ્યુચર્સ ઇન્ડસ્ટ્રી એસોસિએશન (FIA)ના આંકડા મુજબ, કેલેન્ડર વર્ષ 2025માં ટ્રેડિંગ વોલ્યુમ (કોન્ટ્રાક્ટ્સ)ની દ્રષ્ટિએ NSE વિશ્વનું સૌથી મોટું ડેરિવેટિવ્ઝ એક્સચેન્જ છે. વર્લ્ડ ફેડરેશન ઓફ એક્સચેન્જીસ (WFE)ના આંકડા મુજબ, 2025માં ટ્રેડ્સની સંખ્યાના આધારે ઇક્વિટી સેગમેન્ટમાં NSE વિશ્વમાં ત્રીજા ક્રમે છે.
રેડસીયર રિપોર્ટ અનુસાર, નાણાકીય વર્ષ 2011થી નાણાકીય વર્ષ 2026 અને 30 જૂન, 2026ના રોજ પૂરા થયેલા ત્રણ મહિનાના સમયગાળા દરમિયાન, NSE કેશ માર્કેટ અને ઇક્વિટી ડેરિવેટિવ્ઝમાં કુલ ટર્નઓવરની દ્રષ્ટિએ ભારતનું સૌથી મોટું સ્ટોક એક્સચેન્જ રહ્યું છે. તેમજ, નાણાકીય વર્ષ 2009થી નાણાકીય વર્ષ 2026 અને 30 જૂન, 2026ના રોજ પૂરા થયેલા ત્રણ મહિનાના સમયગાળા દરમિયાન, એક્સચેન્જ-ટ્રેડેડ કરન્સી ડેરિવેટિવ્ઝમાં કુલ ટર્નઓવરની દ્રષ્ટિએ પણ તે ભારતનું સૌથી મોટું સ્ટોક એક્સચેન્જ રહ્યું છે.
વર્લ્ડ ફેડરેશન ઓફ એક્સચેન્જીસ અનુસાર, વૈશ્વિક સ્તરે અગ્રણી લિસ્ટેડ સ્ટોક એક્સચેન્જ જૂથોની તુલનામાં, આ કંપની કેશ ઇક્વિટીમાં ટ્રેડની સંખ્યા અને ઇક્વિટી ડેરિવેટિવ્ઝમાં ટ્રેડ થયેલા કોન્ટ્રાક્ટ્સની સંખ્યાની દ્રષ્ટિએ સૌથી મોટું મલ્ટી-એસેટ ક્લાસ એક્સચેન્જ છે. નાણાકીય વર્ષ 2026માં તેનો વૈશ્વિક બજાર હિસ્સો કેશ ઇક્વિટીમાં ટ્રેડની સંખ્યામાં 11.38 ટકા અને ઇક્વિટી ડેરિવેટિવ્ઝમાં ટ્રેડ થયેલા કોન્ટ્રાક્ટ્સમાં 51.18 ટકા હતો. જ્યારે 30 જૂન, 2026ના રોજ પૂરા થયેલા ત્રણ મહિનાના સમયગાળામાં આ હિસ્સો કેશ ઇક્વિટીમાં ટ્રેડની સંખ્યામાં 10.68 ટકા અને ઇક્વિટી ડેરિવેટિવ્ઝમાં ટ્રેડ થયેલા કોન્ટ્રાક્ટ્સમાં 50.22 ટકા હતો.
કંપની ભારતમાં "પ્રથમ સ્તરના નિયમનકાર" (ફર્સ્ટ લેવલ રેગ્યુલેટર) તરીકે કાર્ય કરે છે. આ ભૂમિકામાં તે રોકાણકારો, ઇશ્યુઅર્સ અને મધ્યસ્થીઓ સહિત તમામ બજાર સહભાગીઓને સ્ટોક માર્કેટમાં સમાન, અપ્રતિબંધિત, પારદર્શક અને નિષ્પક્ષ પ્રવેશ પૂરો પાડવા માટે પ્રતિબદ્ધ છે.