પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA) એ નેશનલ પેન્શન સિસ્ટમ (NPS) હેઠળની યોજનાઓના નામોમાં મોટો ફેરફાર કર્યો છે. આ નવા નિયમો 1 ડિસેમ્બર 2026 થી દેશભરમાં અમલમાં આવશે. જે લોકો NPS માં રોકાણ કરી રહ્યા છે અથવા નવું ખાતું ખોલાવવાનું વિચારી રહ્યા છે તેમને આ ફેરફારની અસર થશે.
PFRDA ના જણાવ્યા અનુસાર, આ ફેરફારનો મુખ્ય હેતુ સામાન્ય રોકાણકારોને વિવિધ પેન્શન ફંડ યોજનાઓ સરળતાથી સમજી શકે અને તેમની વચ્ચે તુલના કરી શકે તે છે. હાલમાં યોજનાઓના નામમાં A, B, C, D અને E જેવા કેટેગરી કોડનો ઉપયોગ થાય છે, જે હવે સંપૂર્ણપણે દૂર કરવામાં આવશે. આનાથી યોજનાના નામ ટૂંકા અને સરળ બનશે.
નવા નિયમ હેઠળ, પેન્શન ફંડના નામમાં પેન્શન ફંડનું ટૂંકું નામ, NPS શબ્દ અને યોજનાનું એક અનોખું નામ સામેલ કરવાનું રહેશે. ઉદાહરણ તરીકે, 'XYZ NPS નિવૃત્તિ યોજના'. જો એક જ પેન્શન ફંડ એક જ શ્રેણીમાં એક કરતા વધુ યોજનાઓ ચલાવતું હોય, તો તેમણે દરેક યોજનાને અલગ અને સ્પષ્ટ નામ આપવાનું રહેશે.
ટાયર-1 યોજનાઓના નામમાં પાછળ 'ટાયર-1' લખવાની જરૂર રહેશે નહીં. તે મૂળભૂત યોજના તરીકે ઓળખાશે. પરંતુ ટાયર-2 યોજનાઓના નામના અંતે ફરજિયાતપણે 'ટાયર-2' લખાયેલું હોવું જરૂરી છે, જેથી રોકાણકારો બંને ખાતા વચ્ચેનો તફાવત સરળતાથી સમજી શકે.
ઘણા રોકાણકારોને પ્રશ્ન થાય કે કેટેગરી કોડ દૂર થવાથી જોખમ વિશે કેવી રીતે ખબર પડશે? PFRDA એ સ્પષ્ટ કર્યું છે કે કોઈપણ જાહેરાત, સત્તાવાર વેબસાઇટ, બ્રોશર કે અન્ય જાહેર દસ્તાવેજમાં યોજનાનું નામ, તેની વૃદ્ધિની શ્રેણી અને જોખમનું સ્તર સ્પષ્ટપણે દર્શાવવું ફરજિયાત રહેશે. આનાથી પારદર્શિતા વધશે અને રોકાણકારોને પૂરી માહિતી મળશે.