ઉત્તર કોરિયાએ રવિવારે પૂર્વ કિનારેથી બે શોર્ટ રેન્જ બેલિસ્ટિક મિસાઈલોનું પરીક્ષણ કર્યું હતું. દક્ષિણ કોરિયાના સંરક્ષણ મંત્રાલયના જણાવ્યા અનુસાર, આ મિસાઈલોએ 450 થી 600 કિલોમીટરથી વધુ અંતર કાપ્યું હતું. આ અઠવાડિયામાં ઉત્તર કોરિયાનું આ બીજું મિસાઈલ પરીક્ષણ હતું.
દક્ષિણ કોરિયાના સંરક્ષણ મંત્રાલયના જણાવ્યા મુજબ, વૉનસન વિસ્તારમાંથી લોન્ચ કરાયેલી પહેલી મિસાઈલે લગભગ 450 કિલોમીટર અને બીજી મિસાઈલે 600 કિલોમીટરથી વધુ અંતર કાપ્યું હતું. દક્ષિણ કોરિયન સેનાનું અનુમાન છે કે આ મિસાઈલો હ્યાસોંગ-11 શ્રેણીની હોઈ શકે છે.
આ મિસાઈલોમાંથી એક જાપાનના વિશેષ આર્થિક ક્ષેત્ર (EEZ) સુધી પહોંચતા પહેલા સમુદ્રમાં પડી હતી. આ ઘટનાને પગલે અમેરિકા, જાપાન અને દક્ષિણ કોરિયાની સુરક્ષા એજન્સીઓ સતર્ક થઈ ગઈ છે. દક્ષિણ કોરિયા અને જાપાને આ હરકતનો સખત વિરોધ નોંધાવ્યો છે.
દક્ષિણ કોરિયાની નેશનલ સિક્યોરિટી કાઉન્સિલે આ પરીક્ષણને સંયુક્ત રાષ્ટ્ર સુરક્ષા પરિષદ (UNSC)ના પ્રસ્તાવોનું સીધું ઉલ્લંઘન ગણાવ્યું છે. જાપાનના રક્ષા મંત્રી શિંજિરો કોઇઝુમીએ જણાવ્યું કે ઉત્તર કોરિયાની આ કાર્યવાહી ક્ષેત્ર અને આંતરરાષ્ટ્રીય સમુદાયની શાંતિ અને સુરક્ષા માટે મોટો ખતરો છે.
ઉલ્લેખનીય છે કે તાજેતરમાં અમેરિકા, દક્ષિણ કોરિયા અને જાપાન દ્વારા કરવામાં આવેલા સંયુક્ત સૈન્ય અભ્યાસો સામે ઉત્તર કોરિયાએ નારાજગી વ્યક્ત કરી હતી. ઉત્તર કોરિયાના નેતા કિમ જોંગ ઉનની બહેન કિમ યો જોંગે તાજેતરમાં જ અમેરિકાની આગેવાની હેઠળના સૈન્ય અભ્યાસોને તણાવનું કારણ ગણાવ્યું હતું અને પોતાના પરમાણુ શસ્ત્રો મજબૂત કરવાની નીતિમાં કોઈ ફેરફાર નહીં થાય તેવો દાવો કર્યો હતો.