ટાટા ગ્રુપમાં નેતૃત્વ અને ગવર્નન્સને લઈને વિવાદ વધ્યો છે. ટાટા ટ્રસ્ટ્સના સંયુક્ત નોમિની ડિરેક્ટર વેણુ શ્રીનિવાસને સવાલ ઉઠાવ્યો છે કે નોએલ ટાટા ચેરમેન તરીકે ચાલુ રહેવાની સાથે ગ્રુપની મુખ્ય ઓપરેટિંગ હોલ્ડિંગ કંપની 'ટાટા સન્સ'ના મામલામાં કેવી રીતે સામેલ થઈ શકે છે.
ઇકોનોમિક ટાઇમ્સના અહેવાલ મુજબ, શ્રીનિવાસને મહારાષ્ટ્ર ચેરિટી કમિશનરને પત્ર લખીને નોએલને કાયમ માટે ટ્રસ્ટી અને ચેરમેન બનાવી રાખવા સામે વાંધો વ્યક્ત કર્યો છે. આ ઉપરાંત, તેમણે નોએલના પુત્ર નેવિલ ટાટાને ટ્રસ્ટી બનાવવાના નિર્ણય પર પણ સવાલ ઉઠાવ્યા છે.
શ્રીનિવાસન અનુસાર, ટાટા ટ્રસ્ટ્સ હવે સમાજસેવાના પોતાના મુખ્ય કાર્યથી ભટકી જઈને કંપનીઓના વ્યવસાયિક નિર્ણયોમાં દખલ કરી રહ્યા છે. ટ્રસ્ટીઓ પોતે મોટા કારોબારી સોદાઓ નક્કી કરવા, વાટાઘાટો કરવા અને તેમને અંતિમ સ્વરૂપ આપવામાં વ્યસ્ત છે, જે ચેરિટી ટ્રસ્ટના નિયમોની વિરુદ્ધ છે.
ટાટા અને શ્રીનિવાસન વચ્ચેના વિવાદના 2 કારણો
1. ટાટા સન્સને શેરબજારમાં ઉતારવું કે નહીં, તેના પર બંનેના વિચારો અલગ છે. શ્રીનિવાસન ઈચ્છે છે કે કંપની બજારમાં લિસ્ટ થાય, જ્યારે નોએલ ટાટા તેના સખત વિરોધમાં છે.
2. ટાટા સન્સના ચેરમેન તરીકે એન. ચંદ્રશેખરની ફરીથી નિમણૂક અને તેમની કામ કરવાની રીતોને લઈને પણ બંને વચ્ચે મતભેદ છે.
શ્રીનિવાસનને મતદાન કરતા રોકવાનો પ્રયાસ
વિવાદ એટલો ઊંડો બની ગયો કે 'સર દોરાબજી ટાટા ટ્રસ્ટ'એ વેણુ શ્રીનિવાસનને ટાટા સન્સની બોર્ડ બેઠકોમાં ભાગ લેવા અને મતદાન કરવા દેવાથી રોકવાનો પ્રયાસ કર્યો. ટ્રસ્ટનો તર્ક હતો કે લિસ્ટિંગને સમર્થન આપવું ટ્રસ્ટના વલણની વિરુદ્ધ છે, તેથી શ્રીનિવાસનને ટ્રસ્ટ તરફથી મત આપવાનો અધિકાર ન હોવો જોઈએ.
વેણુ શ્રીનિવાસન ટીવીએસ મોટર કંપનીના માનદ ચેરમેન અને ટાટા ગ્રુપની મુખ્ય હોલ્ડિંગ સંસ્થા 'ટાટા ટ્રસ્ટ્સ'ના ટ્રસ્ટી છે.
ટાટાએ કહ્યું- અમારી પાસે લિસ્ટિંગથી બચવાનો ઉકેલ
ટાટા સન્સના લિસ્ટિંગને ટાળવા માટે નોએલ ટાટા RBIના નિયમો હેઠળ જ રસ્તો શોધી રહ્યા છે. તાજેતરમાં આપેલા એક ઇન્ટરવ્યુમાં નોએલ ટાટાએ કહ્યું, "અમે ટાટા સન્સને એક સંભવિત ઉકેલ મોકલ્યો છે, જે અમારા વિચાર મુજબ RBIની હાલની માર્ગદર્શિકાઓના દાયરામાં આવે છે. અમે ઇચ્છીએ છીએ કે ટાટા સન્સ આ અંગે વિચાર કરે અને જરૂર પડે તો RBI સાથે વાતચીત કરે."
નોએલ ટાટાએ આશા વ્યક્ત કરી કે RBI અને ટાટા ટ્રસ્ટ્સ વચ્ચે એવા કોઈ ઉકેલ પર સહમતિ બની શકે છે, જેના કારણે ટાટા સન્સનું શેરબજારમાં લિસ્ટિંગ ટાળી શકાય. તેમણે કહ્યું, "આ એક એવો માર્ગ છે, જે આપણને આપણા મૂળ તરફ પાછો લઈ જાય છે."
મર્જર ટાટા સન્સને લિસ્ટિંગથી બચાવશે
બે દિવસ પહેલાં સમાચાર આવ્યા હતા કે ટાટા સન્સને શેરબજારમાં લિસ્ટેડ થવાથી બચાવવા માટે નોએલ ટાટાએ નવી યોજના બનાવી છે. આ યોજના હેઠળ ટાટાની બે અલગ કંપનીઓ- ટાટા ઇલેક્ટ્રોનિક્સ અને ટાટા કન્સલ્ટિંગ એન્જિનિયર્સનું ટાટા સન્સ સાથે મર્જર કરવામાં આવશે.
મર્જર બાદ ટાટા સન્સ ઇન્વેસ્ટમેન્ટ કંપનીને બદલે પોતે પણ સેવાઓ અથવા સામાનનું ઉત્પાદન અને વેચાણ કરતી કંપની બની જશે. તેના કારણે ટાટા સન્સ RBIના કડક નિયમોના દાયરાની બહાર થઈ જશે. આથી ટાટા ગ્રુપ પોતાની હોલ્ડિંગ કંપની પરનું સંપૂર્ણ નિયંત્રણ પોતાની પાસે જાળવી શકશે.
પોતાના 100 વર્ષના સફરમાં 80 વર્ષ સુધી ટાટા સન્સે આ જ રીતે પોતાનો બિઝનેસ ચલાવ્યો છે. ટાટા ટ્રસ્ટ્સના સલાહકાર અને ટાટા સન્સના ભૂતપૂર્વ કંપની સેક્રેટરી એફ. એન. સુબેદારના જણાવ્યા મુજબ, આ કોઈ નવો પ્રયોગ નથી, પરંતુ ટાટા સન્સના જૂના બિઝનેસ મોડલ તરફનું પુનરાગમન છે.