એશિયન ગેમ્સ 2026માં ભારતીય કુસ્તીબાજ નિતેશ સિવાચે ગ્રીકો-રોમન કુસ્તીની 97+ કિગ્રા શ્રેણીમાં સિલ્વર મેડલ જીતીને દેશને ગૌરવ અપાવ્યું છે. તે જાપાનના યુરી નાકાઝાટો સામેની ફાઇનલમાં હારી ગયો, પરંતુ તેની આ સિદ્ધિ 64 વર્ષના લાંબા દુષ્કાળનો અંત લાવી છે.
1962ના જકાર્તા એશિયન ગેમ્સમાં ગણપત અંદાલકરે આ જ શ્રેણીમાં બ્રોન્ઝ મેડલ જીત્યો હતો. ત્યારપછી કોઈ ભારતીય કુસ્તીબાજ ગ્રીકો-રોમનની 97+ કિગ્રા વર્ગમાં ફાઇનલ સુધી પહોંચી શક્યો નહોતો. નિતેશે આ શ્રેણીમાં ફાઇનલમાં સ્થાન મેળવીને અને સિલ્વર મેડલ જીતીને ઇતિહાસ રચ્યો છે.
નિતેશનો ફાઇનલ સુધીનો માર્ગ મજબૂત રહ્યો. ક્વાર્ટર ફાઇનલમાં તેણે તુર્કમેનિસ્તાનના અમનબર્ડી અગામામેદોવને 7-1થી હરાવ્યો. સેમિફાઇનલમાં મંગોલિયાના ગાંખુઆંગ ગાંબાતર સામે પ્રથમ ત્રણ મિનિટમાં જ 9-0ની આગેવાની સાથે જીત મેળવીને ફાઇનલમાં પ્રવેશ કર્યો.
હરિયાણાના સોનીપત જિલ્લાના જગસી ગામના વતની નિતેશના પિતા આનંદ સિવાચ દૂધનો નાનો વ્યવસાય ચલાવે છે. શરૂઆતમાં ક્રિકેટ ખેલનાર નિતેશે પ્રતાપ સ્પોર્ટ્સ સ્કૂલમાં કોચ ઓમ પ્રકાશ દહિયાના માર્ગદર્શન હેઠળ કુસ્તીની તાલીમ લીધી. કારકિર્દીની શરૂઆતમાં ઘૂંટણની ગંભીર ઇજાને કારણે તેને કુસ્તી છોડવી પડી. તે સમયે તેણે ઘરે-ઘરે દૂધ પહોંચાડીને પરિવારને ટેકો આપ્યો. ઇજામાંથી સ્વસ્થ થયા બાદ મેટ પર પરત ફર્યો અને એશિયન ગેમ્સના પોડિયમ સુધી પહોંચ્યો.
નિતેશના આંતરરાષ્ટ્રીય મેડલની વાત કરીએ તો 2019માં કેડેટ એશિયન ચેમ્પિયનશિપમાં સિલ્વર, 2022માં અંડર-23 વર્લ્ડ ચેમ્પિયનશિપમાં બ્રોન્ઝ, 2025માં સિનિયર એશિયન ચેમ્પિયનશિપમાં બ્રોન્ઝ, 2026માં એશિયન ચેમ્પિયનશિપમાં સિલ્વર અને હવે એશિયન ગેમ્સમાં સિલ્વર મેડલ જીત્યો છે.