સત્ય. સાહસ. સંકલ્પ.

નિમ્મીની કરોડોની સંપત્તિ પર કેરટેકરનો આરોપ: મુંબઈ પોલીસે FIR નોંધી

નિમ્મીની કરોડોની સંપત્તિ પર કેરટેકરનો આરોપ: મુંબઈ પોલીસે FIR નોંધી

દિગ્ગજ અભિનેત્રી નિમ્મીનું 2020માં અવસાન થયું હતું. તેમના નિધનને છ વર્ષ વીતી ગયા બાદ હવે તેમની કરોડોની સંપત્તિને લઈને વિવાદ ઊભો થયો છે. મુંબઈ પોલીસે તેમના પૂર્વ કેરટેકર વિરુદ્ધ ફરિયાદ નોંધી છે. આરોપ છે કે કેરટેકરે 1.77 કરોડ રૂપિયાની એફડી, દાગીના અને ફ્લેટ પર ગેરકાયદે કબજો કર્યો છે.

ફરિયાદ શું છે?

નિમ્મીના સંબંધી મોહમ્મદ યુનુસ સલીમ દુર્રાણી (48)એ કેરટેકર વિરુદ્ધ પોલીસમાં ફરિયાદ નોંધાવી છે. તેમના જણાવ્યા મુજબ, મુંબઈના જુહૂ વિસ્તારમાં આવેલા નિમ્મીના બે ફ્લેટની કિંમત અંદાજે 7થી 8 કરોડ રૂપિયા છે. આ ઉપરાંત 1.77 કરોડ રૂપિયાની એફડી, દાગીના અને એક કાર પણ તેમની સંપત્તિમાં સામેલ હતી.

ફરિયાદમાં આરોપ છે કે નિમ્મીના નિધન બાદ તેમના કેરટેકરે એફડીની રકમ પોતાને મેળવી લીધી, કાર ભંગારમાં વેચી દીધી અને ફ્લેટ પર કબજો કરવાનો પ્રયાસ કર્યો. આ મામલે પોલીસ તપાસ ચાલી રહી છે.

દત્તક પુત્રના નામે હતી વસિયત

નિમ્મીએ સ્ક્રીનરાઇટર અલી રઝા સાથે લગ્ન કર્યા હતા, પરંતુ આ લગ્નથી તેમને કોઈ સંતાન નહોતું. તેથી તેમણે પોતાની બહેનના પુત્ર અલી સૈયદ પરવેઝને દત્તક લીધો હતો અને વસિયતમાં મિલકત તેના નામે કરી હતી.

પતિના અવસાન બાદ નિમ્મી મુંબઈમાં એકલા રહેતા હતા. તેમનો દત્તક પુત્ર પરવેઝ મૅન્ચેસ્ટરમાં રહેતો હતો. જીવનના અંતિમ વર્ષોમાં કેરટેકર જ તેમના ઘર અને નાણાકીય બાબતોની દેખરેખ રાખતો હતો. નિમ્મીએ હાઉસહેલ્પ અસ્રાર શેખ સાથે એક સંયુક્ત બેંક ખાતું પણ ખોલાવ્યું હતું. વર્ષ 2020માં નિમ્મીના અવસાન બાદ તેમના દત્તક પુત્રનું પણ અવસાન થયું હતું.

રાજ કપૂરની બહેન બન્યા

નિમ્મી 1950ના દાયકાની સૌથી સુંદર અભિનેત્રીઓમાં ગણાતા હતા. રાજ કપૂરે ફિલ્મ ‘બરખા’ દ્વારા તેમને હિન્દી સિનેમામાં પરિચય કરાવ્યો હતો. એક વખત નિમ્મી પોતાના માસી સાથે ફિલ્મ ‘અંદાજ’નું શૂટિંગ જોવા મહેબૂબ સ્ટુડિયો ગયા હતા. ત્યારે રાજ કપૂર તેમની સુંદરતાથી પ્રભાવિત થઈ ગયા અને તેમને પોતાની ફિલ્મમાં તક આપી. સેટ પર નિમ્મી ડરીને રહેતા હતા, તેથી રાજ કપૂરે તેમને રાખડી બાંધીને પોતાની માનેલી બહેન બનાવી લીધા હતા.

‘બરસાત’ ફિલ્મથી શરૂઆત કર્યા બાદ નિમ્મીએ ‘બાંવરા’, ‘સજા’, ‘આંધિયાં’, ‘દીદાર’, ‘દાગ’, ‘અમર’, ‘શમા’, ‘ચાર દિન ચાર રાહેં’ અને ‘બડી બહૂ’ જેવી અનેક મોટી ફિલ્મોમાં કામ કર્યું હતું.

દિલીપ કુમાર સાથે એકતરફી પ્રેમ

નિમ્મીએ દિલીપ કુમાર સાથે ‘આન’, ‘અમર’, ‘દીદાર’, ‘દાગ’ અને ‘ઉડન ખટોલા’ એમ કુલ પાંચ ફિલ્મોમાં કામ કર્યું હતું. પડદા ઉપરની જોડી સાથે પડદા પાછળ પણ નિમ્મી દિલીપ કુમારને પસંદ કરતા હતા. ફિલ્મફેરને આપેલા એક ઇન્ટરવ્યૂમાં તેમણે આ વાત જાતે કબૂલ કરી હતી.

નિમ્મીએ કહ્યું હતું, “દિલીપ કુમાર ચુંબક જેવા હતા, જેમની તરફ દરેક વ્યક્તિ ખેંચાઈ આવતી હતી. હું પણ તેમાંથી એક હતી. મધુબાલા અને બીજી સુંદર મહિલાઓ તેમને પ્રેમ કરતી હતી, તો હું તેમની બરાબરી કેવી રીતે કરી શકતી? મારું દિલ ખરાબ રીતે તૂટી ગયું હતું. મેં એવી ઇચ્છા રાખી હતી જે મને ક્યારેય મળી શકે તેમ નહોતી. આ વિચારથી જ હું તેમનાથી દૂર રહી.”

એક વખત ફિલ્મ ‘આન’ના શૂટિંગ દરમિયાન તલવાર ફેંકતી વખતે દિલીપ કુમારને નિમ્મીની તલવારની અણીથી ઈજા થઈ હતી. નિમ્મીએ માફી માગી તો દિલીપ કુમારે જવાબ આપ્યો હતો, ‘અમે વિચારીશું, જિંદગીમાં એક ઈજા વધુ સહન કરી લીધી.’ આ શબ્દો સાંભળીને નિમ્મી આખી રાત તેમના વિચારોમાં ખોવાયેલા રહ્યા હતા.

નિમ્મીને ભારતની ‘અનકિસ્ડ ગર્લ’ પણ કહેવામાં આવતું હતું. એક હોલિવૂડ અભિનેતાએ તેમનો હાથ ચુંબન કરવાનો પ્રયાસ કર્યો ત્યારે તેમણે તેને રોકી દીધો હતો, એ ઘટનાને કારણે તેમને આ નામ મળ્યું હતું.