કાઠમંડુ, 4 સપ્ટેમ્બર: નેપાળમાં ત્રિશુલી નદીના પૂરને કારણે થયેલી ભયાનક દુર્ઘટના વચ્ચે બચાવકર્મીઓએ 30 વર્ષીય સંજય સાહ નામના કામદારને સુરંગમાંથી જીવતો બહાર કાઢ્યો છે. તે 9 દિવસથી અંધારી સુરંગમાં ફસાયેલો હતો. આ ઘટના શુક્રવારે જન્માષ્ટમીના દિવસે બની, જેને લોકો દૈવી ચમત્કાર ગણાવી રહ્યા છે.
સંજય સાહ મધેશ પ્રાંતના સપ્તરી જિલ્લાનો રહેવાસી છે અને નેપાળ ઇલેક્ટ્રિસિટી ઓથોરિટીમાં ફોરમેન તરીકે કામ કરે છે. દુર્ઘટના સમયે તે ત્રિશુલી 3A હાઇડ્રોપાવર પ્રોજેક્ટની સુરંગમાં હતો. પૂર આવ્યું ત્યારે તેણે પ્રથમ અન્ય કામદારોને ભાગવાની ચેતવણી આપી, પરંતુ પોતાનો કાબૂ ચૂકી જતાં તે સુરંગમાં જ ફસાઈ ગયો.
સુરંગના અંધકારમાં તેણે 9 દિવસ વિતાવ્યા. આ દરમિયાન તે અન્ય ફસાયેલા કામદારો સાથે અવાજ દ્વારા સંપર્કમાં રહ્યો. બચાવ ટીમની કામગીરી દરમિયાન સંજય સાહે 'હરે કૃષ્ણ' મંત્રનો જાપ કરીને હિંમત ટકાવી રાખી હોવાનું જણાવ્યું છે.
બચાવેલા અન્ય કામદાર 45 વર્ષીય કબીર મહાજન છે, જે મિકેનિકલ સુપરવાઇઝર છે. તેની તબિયત વધુ ખરાબ હોવાથી તેને એરલિફ્ટ કરીને કાઠમંડુની નેપાળ આર્મી હોસ્પિટલમાં લઈ જવાયો છે. સંજય સાહને ત્રિશુલીની સ્થાનિક હોસ્પિટલમાં દાખલ કરવામાં આવ્યો છે અને તેની સ્થિતિ સ્થિર છે.
26 ઓગસ્ટે નેપાળ-તિબેટ સરહદ પાસે હિમપ્રપાત અને ખડકો ધસી આવવાથી અચાનક પૂર આવ્યું હતું. આ પૂરથી ઉત્તર અને મધ્ય નેપાળમાં ભારે તબાહી મચી છે. અધિકારીઓના અંદાજ મુજબ ત્રિશુલી નદી કિનારે આવેલા 6 પ્રોજેક્ટની સુરંગોમાં હજુ પણ 900 જેટલા લોકો ફસાયેલા હોઈ શકે છે. નેપાળી સેનાની આગેવાની હેઠળ શોધ અને બચાવ કામગીરી ચાલુ છે.