કાઠમંડુ: નેપાળમાં આવેલા ભયંકર પૂરના 10 દિવસ પછી ત્રિશુલી-3 'A' હાઇડ્રોપાવર પ્રોજેક્ટની સુરંગમાંથી બે મજૂરોને જીવતા બહાર કાઢવામાં આવ્યા છે. શુક્રવારે સવારે બચાવ ટીમે બંનેને સુરક્ષિત બહાર કાઢ્યા હતા. તેમની ઓળખ સંજય સાહ અને કબીર મહર્જન તરીકે થઈ છે.
પૂર પછી સુરંગમાં 42 કર્મચારીઓ અને મજૂરો ફસાયા હોવાની માહિતી સામે આવી હતી. બે લોકો જીવતા મળ્યા પછી બચાવ અભિયાનમાં આશા વધી છે. બચાવ કામગીરી દરમિયાન સુરંગની અંદરથી માનવીય અવાજ સંભળાયો હોવાની માહિતી મળી હતી. આ પછી નેપાળ સેના અને સશસ્ત્ર પોલીસ દળની ટીમો સુરંગમાં દાખલ થઈ અને શોધ અભિયાન તેજ કર્યું હતું.
પૂરને કારણે અત્યાર સુધીમાં 5,300 થી વધુ લોકો ગુમ છે. અત્યાર સુધીમાં 1,259 લોકોના મોત થયા છે, જ્યારે રાહત અને બચાવ ટીમોએ 12,038 લોકોને સુરક્ષિત બહાર કાઢ્યા છે. ચિતવન જિલ્લામાં સૌથી વધુ મૃતદેહો મળ્યા છે, જ્યારે અત્યાર સુધી મળેલા મૃતદેહોમાંથી 95ની ઓળખ થઈ ચૂકી છે.
નેપાળની તબાહીમાં ભારત સૌથી મોટું મદદગાર બન્યું છે. ભારતે 5 ખેપમાં 74 ટન રાહત સામગ્રી મોકલી છે, અને ડોકટરો, બચાવ નિષ્ણાતો અને ફોરેન્સિક ટીમને પણ નેપાળ પહોંચાડવામાં આવી છે. ભારતીય અધિકારીઓએ કાઠમંડુ એરપોર્ટ પર નેપાળી અધિકારીઓને મદદ સોંપી હતી.
નેપાળના વિદેશ મંત્રી શિશિર ખનાલે સ્પષ્ટ કર્યું છે કે નેપાળે ભારત, ચીન કે અમેરિકા પાસેથી આબોહવા વળતરની માગ કરી નથી. તેમણે કહ્યું કે નેપાળની અપીલ માત્ર એટલી જ છે કે દુનિયા રસૂવાની આપત્તિને આબોહવા પરિવર્તનની અસરના દૃષ્ટિકોણથી જુએ અને હિમાલયી દેશોની મદદ માટે આગળ આવે. ખનાલે ભારતની તાત્કાલિક રાહત અને બચાવ સહાયતા માટે આભાર વ્યક્ત કર્યો હતો.
નેપાળના રસૂવા અને નુવાકોટમાં અચાનક આવેલા પૂર પછી લગભગ 600 બાળકો હજુ પણ ગુમ છે. રસૂવામાં લગભગ 280, જ્યારે નુવાકોટમાં 300-350 બાળકો ગુમ હોવાની માહિતી છે. એકલા નુવાકોટની બિદુર નગરપાલિકામાં લગભગ 250 બાળકો ગુમ હોવાનું જણાવાયું છે. પૂરના કારણે બંને જિલ્લાના 22 શિક્ષકો અને શાળા કર્મચારીઓ પણ ગુમ છે.
અમેરિકી ટેક કંપની એનવીડિયાએ ભોટેકોશી પૂર પછી રાહત અને પુનર્નિર્માણ માટે 10 મિલિયન ડોલર એટલે કે 1 કરોડ અમેરિકી ડોલર (લગભગ 1.5 અબજ નેપાળી રૂપિયા) ની સહાયતા આપી છે. નાણા મંત્રી સ્વર્ણિમ વાગલેએ એનવીડિયાના CEO જેન્સેન હુઆંગનો મદદ માટે આભાર માન્યો છે.
નેપાળના વડાપ્રધાન બાલેન્દ્ર શાહ (બાલેન) સંયુક્ત રાષ્ટ્ર મહાસભાના 81મા સત્રમાં આબોહવા પરિવર્તન અને પર્વતીય વિસ્તારો પર તેની અસરનો મુદ્દો ઉઠાવી શકે છે. રસુવામાં વિનાશકારી પૂર પછી શાહે મહાસભામાં ભાગ લેવાની ઈચ્છા વ્યક્ત કરી છે.