નેપાળમાં ગુરુવારે વહેલી સવારે 4:30 વાગ્યે રિક્ટર સ્કેલ પર 4.9ની તીવ્રતાનો ભૂકંપ આવ્યો હતો. ભારતીય સમય અનુસાર આ આંચકા અનુભવાયા હતા. ભૂકંપનું કેન્દ્રબિંદુ જમીનથી 73 કિલોમીટરની ઊંડાઈએ હોવાનું નેશનલ સેન્ટર ફોર સિસ્મોલોજીએ જણાવ્યું છે.
આંચકા એટલા સ્પષ્ટ હતા કે ઊંઘી રહેલા લોકો ઘરોની બહાર દોડી આવ્યા હતા. સદનસીબે, હજુ સુધી જાનમાલના મોટા નુકસાનના કોઈ અહેવાલ મળ્યા નથી. સ્થાનિક વહીવટી તંત્ર પરિસ્થિતિ પર સતત નજર રાખી રહ્યું છે અને લોકોને સાવચેત રહેવાની સલાહ આપવામાં આવી છે.
નેપાળ હિમાલયન બેલ્ટમાં આવેલું હોવાથી ત્યાં ભૂસ્તરશાસ્ત્રીય હલચલને કારણે ભૂકંપના આંચકા આવતા રહે છે. વૈજ્ઞાનિકોના જણાવ્યા મુજબ, 4.5 કે તેથી વધુ તીવ્રતાના ભૂકંપ મકાનોને નુકસાન પહોંચાડી શકે છે, પરંતુ આ આંચકાની ઊંડાઈ વધુ હોવાથી મોટા નુકસાનની શક્યતા ઓછી છે. આ પહેલાં 1 નવેમ્બરે જાપાનમાં 6.0 તીવ્રતાનો ભૂકંપ આવ્યો હતો, જેમાં પણ મોટી દુર્ઘટના ટળી હતી.