નેપાળના ગોરખા જિલ્લામાં બુઢી ગંડકી નદીમાં અચાનક પૂર આવતાં ઓછામાં ઓછા 10 લોકો ગુમ થયા છે, 6 પુલ તણાઈ ગયા છે અને લગભગ 35 ઘર તબાહ થઈ ગયા છે. બુઢી ગંડકી હાઇડ્રો પાવર પ્રોજેક્ટની કેમ્પ બિલ્ડિંગ પણ પૂરમાં નષ્ટ થઈ ગઈ છે. નદીનું જળસ્તર ઝડપથી વધી રહ્યું હોવાથી તટીય વિસ્તારોમાં રહેતા લોકોને સુરક્ષિત સ્થળે ખસી જવાની ચેતવણી અપાઈ છે.
બચાવ અને રાહત કાર્યો માટે સેનાના જવાનો અને હેલિકોપ્ટરોને તૈનાત કરવામાં આવ્યા છે. નેપાળ પોલીસ સતત માઇક પર એનાઉન્સમેન્ટ કરીને લોકોને સુરક્ષિત સ્થળોએ જવા અપીલ કરી રહી છે. વડાપ્રધાન બાલેન શાહે જણાવ્યું છે કે આર્મીની એક ટુકડીને હવાઈ માર્ગે સ્થિતિ પર કાબૂ મેળવવા અને લોકોની સુરક્ષા માટે મોકલવામાં આવી રહી છે. ગૃહમંત્રી સુડાન ગુરુંગે કહ્યું કે હેલિકોપ્ટર ટીમો સહિત સુરક્ષાકર્મીઓને રાહત કાર્યમાં લગાવવામાં આવ્યા છે. તેમણે ચેતવણી આપી કે ઘાટ્ટેખોલામાં કેટલાક ઘરોમાં પૂરનું પાણી ઘૂસી ગયું છે અને ચુમનુબરી ગ્રામીણ નગરપાલિકાના વોર્ડ 3માં ન્યાકચેટ અને ફિલ્મ બજારને જોડતો પુલ નષ્ટ થયો છે.
અધિકારીઓ પૂરના કારણોની તપાસ કરી રહ્યા છે. પ્રાથમિક અનુમાન છે કે પહાડ પર થયેલા લેન્ડસ્લાઇડને કારણે કાટમાળથી પાણીનો રસ્તો રોકાઈ ગયો, જેના કારણે અચાનક પૂર આવ્યું. ગોરખા જિલ્લામાંથી લોકો ભાગીને જીવ બચાવતા હોવાના વીડિયો અને તસવીરો સામે આવી રહી છે.
ઉલ્લેખનીય છે કે આ પૂર 26 ઓગસ્ટે રસુવા જિલ્લામાં ભોતે કોશી નદીમાં આવેલી વિનાશક પૂર બાદ આવ્યું છે. નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટી (NDRRMA) અનુસાર, રસુવા અને ત્રિશૂલી નદીના વિસ્તારોમાં આવેલી પૂરમાં 1,455 લોકોએ જીવ ગુમાવ્યો હતો, જ્યારે 5,285 લોકો ગુમ થયા હતા.