અમદાવાદના નારોલ વિસ્તારમાં એક ચોંકાવનારી ઘટના સામે આવી છે, જ્યાં ટ્રાન્સપોર્ટનો વ્યવસાય કરતા એક વેપારીનો મોબાઈલ ફોન ઝૂંટવીને તસ્કરોએ તેમના બેન્ક ખાતામાંથી બેન્કિંગ એપ અને UPI દ્વારા રૂ. 1.16 લાખ પડાવી લીધા છે. આ ઘટના દર્શાવે છે કે મોબાઈલ સ્નેચિંગ હવે માત્ર ફોન વેચવા પૂરતું મર્યાદિત નથી, પરંતુ સીધા બેન્ક ખાતા ખાલી કરવાનું સાધન બની ગયું છે.
શું છે સમગ્ર ઘટના?
નારોલમાં ટ્રાન્સપોર્ટનો વ્યવસાય કરતા વેપારી રોડ પર ચાલતા ચાલતા ફોન પર વાત કરી રહ્યા હતા. તે દરમિયાન બાઈક પર આવેલા બે તસ્કરોએ તેમના હાથમાંથી મોબાઈલ ફોન ઝૂંટવીને પળવારમાં ફરાર થઈ ગયા. ચોરી બાદ બીજા દિવસે વેપારીએ ટેલિકોમ કંપનીમાંથી પોતાના જ નંબરનું નવું સિમકાર્ડ મેળવ્યું. નવું સિમકાર્ડ અન્ય ફોનમાં નાખતાં જ તેમને બેન્કમાંથી નાણાં ડેબિટ થયાના સતત મેસેજ આવવા લાગ્યા.
તપાસમાં ચોંકાવનારી વિગત સામે આવી કે તસ્કરોએ ઝૂંટવેલા મોબાઈલમાં ઇન્સ્ટોલ કરેલી બેન્કિંગ એપ્લિકેશન અને UPI પ્લેટફોર્મનો ગેરકાયદે ઉપયોગ કરીને વેપારીના ખાતામાંથી કુલ રૂ. 1.16 લાખ અન્ય બેન્ક ખાતાઓમાં ટ્રાન્સફર કરી લીધા. છેતરપિંડીની જાણ થતાં જ વેપારીએ તાત્કાલિક સાયબર હેલ્પલાઇન 1930 પર સંપર્ક કર્યો. બનાવ અંગે નારોલ પોલીસે સાયબર ફ્રોડ અને આઈ.ટી. એક્ટની વિવિધ કલમો હેઠળ ગુનો દાખલ કરીને આગળની કાયદેસરની કાર્યવાહી હાથ ધરી છે.
ફોન અનલોક હતો કે OTP મેળવ્યો?
પ્રાથમિક દ્રષ્ટિએ, વેપારી ફોન પર વાત કરી રહ્યા હોવાથી સ્ક્રીન અનલોક સ્થિતિમાં હોવાની શક્યતા છે. અથવા તસ્કરોએ સિમકાર્ડ અન્ય ડિવાઇસમાં નાખીને UPI પિન રીસેટ કરવા માટે OTP મેળવ્યો હોવાની આશંકા છે. આ સિન્ડિકેટ માત્ર સ્થાનિક સ્નેચર્સ પૂરતી સીમિત નથી, પરંતુ ચોરીના ફોનમાંથી તાત્કાલિક સાયબર ફ્રોડ કરતી સંગઠિત ટોળકીની સંડોવણી તરફ ઈશારો કરે છે. પોલીસે આ દિશામાં તપાસ શરૂ કરી છે.
નાગરિકો માટે સાવધાની:
મોબાઈલ ઝૂંટવાય તો તરત જ ટેલિકોમ કંપનીને જાણ કરી સિમકાર્ડ બ્લોક કરાવો, બેન્કને જાણ કરો અને સાયબર હેલ્પલાઇન 1930 પર ફરિયાદ નોંધાવો. ફોનમાં બેન્કિંગ એપ્સ હોય તો તેને લોક રાખવાની અને બે-ફેક્ટર ઓથેન્ટિકેશન વાપરવાની સલાહ નિષ્ણાતો આપે છે.