પશ્ચિમ બંગાળની નંદીગ્રામ વિધાનસભા બેઠકની પેટાચૂંટણી પહેલાં ભાજપના ઉમેદવાર હસીરાની રથના સોગંદનામા અંગે વિવાદ ઊભો થયો છે. કોંગ્રેસે કલકત્તા હાઈકોર્ટમાં અરજી દાખલ કરીને આરોપ લગાવ્યો છે કે સોગંદનામામાં ઉંમર અને શૈક્ષણિક લાયકાતની ખોટી માહિતી આપવામાં આવી છે.
કોંગ્રેસ નેતા અને વકીલ રિત્ઝૂ ઘોષાલે કોર્ટમાં જણાવ્યું કે સોગંદનામામાં હસીરાની રથનું જન્મ વર્ષ 1966 દર્શાવવામાં આવ્યું છે, જ્યારે તેમણે 1965માં ધોરણ 10ની પરીક્ષા પાસ કરી હોવાનો ઉલ્લેખ છે. તેમણે પ્રશ્ન ઉઠાવ્યો કે જન્મ પહેલાં ધોરણ 10 પાસ કરવું કેવી રીતે શક્ય છે.
કોંગ્રેસે શાળાના રેકોર્ડ પર પણ સવાલ ઉઠાવ્યા છે. તેમના જણાવ્યા અનુસાર, ચૌખાલી ગંગા પદ્મ મિલન કન્યા વિદ્યાપીઠની શરૂઆત 1963માં થઈ હતી અને તે સમયે ત્યાં ધોરણ 5 સુધી અભ્યાસ કરાવવામાં આવતો હતો. શાળાને ધોરણ 10 સુધી ભણાવવાની મંજૂરી 1973માં મળી હોવાનો દાવો પણ કરવામાં આવ્યો છે. રિત્ઝૂ ઘોષાલના કહેવા પ્રમાણે, ચૂંટણી પંચે સોગંદનામાની તપાસ કરી હતી, પરંતુ ગેરરીતિ અંગે કોઈ કાર્યવાહી કરી નથી. કોંગ્રેસે માગ કરી છે કે શૈક્ષણિક લાયકાતની માહિતી ખોટી સાબિત થાય તો ઉમેદવારી રદ કરવામાં આવે. અરજી પર હાઈકોર્ટની સુનાવણી ગુરુવારે થવાની છે.
બીજી તરફ, ભાજપે આરોપોને ફગાવી દીધા છે. પાર્ટીનું કહેવું છે કે હસીરાનીની ઉંમર અંગે કોઈ સમસ્યા નથી. ભાજપ મુજબ, તેમણે 1980માં ધોરણ 10માં અભ્યાસ કર્યો હતો અને સોગંદનામામાં ફક્ત ટાઈપિંગની ભૂલ થઈ છે. હસીરાનીની નંદીગ્રામ સ્થિત કાર્યાલયે પણ કહ્યું કે તેમનો જન્મ 1965માં થયો હતો અને તેમણે 1980માં બંગાળમાં ત્યારે અમલમાં રહેલી માધ્યમિક પરીક્ષા પદ્ધતિ હેઠળ મેટ્રિક પાસ કરી હતી.
નંદીગ્રામ બેઠક પર 6 ઓક્ટોબરે પેટાચૂંટણી યોજાશે અને 9 ઓક્ટોબરે મતગણતરી થશે. હસીરાની રથની ઉમેદવારીની જાહેરાત 15 સપ્ટેમ્બરે કરવામાં આવી હતી. તેઓ મુખ્યમંત્રી શુભેન્દુ અધિકારીના અંગત સહાયક (PA) ચંદ્રનાથ રથનાં માતા છે. 4 મેના રોજ બંગાળ વિધાનસભા ચૂંટણીના પરિણામો જાહેર થયાના બે દિવસ બાદ ચંદ્રનાથની ગોળી મારીને હત્યા કરવામાં આવી હતી.
નંદીગ્રામ લાંબા સમયથી તૃણમૂલ કોંગ્રેસ અને ભાજપ વચ્ચેના રાજકીય સંઘર્ષનું કેન્દ્ર રહ્યું છે. 2007ના જમીન અધિગ્રહણ વિરોધી આંદોલને મમતા બેનર્જી અને TMCને 2011માં સત્તા સુધી પહોંચાડવામાં મહત્ત્વની ભૂમિકા ભજવી હતી. 2021માં મમતા બેનર્જીએ અહીંથી તત્કાલીન ભાજપ નેતા અને હાલના મુખ્યમંત્રી શુભેન્દુ અધિકારી સામે ચૂંટણી લડી હતી, પરંતુ તેમને હાર મળી હતી. 2026ની વિધાનસભા ચૂંટણીમાં શુભેન્દુ અધિકારીએ નંદીગ્રામ ઉપરાંત ભવાનીપુર બેઠક પરથી પણ જીત મેળવી હતી. બાદમાં તેમણે ભવાનીપુર બેઠક રાખીને નંદીગ્રામમાંથી રાજીનામું આપી દીધું, જેના કારણે આ બેઠક ખાલી થઈ.
પેટાચૂંટણીમાં TMCએ સંચિતા પ્રધાન ડેને ઉમેદવાર બનાવ્યા હતા, પરંતુ 18 સપ્ટેમ્બરે મુખ્યમંત્રી શુભેન્દુ સાથે મુલાકાત બાદ તેમણે નામ પાછું ખેંચી લીધું હતું. બાદમાં મમતા બેનર્જીએ કોંગ્રેસને સમર્થન આપ્યું હતું.
હવે આગળ શું થઈ શકે? હાઈકોર્ટ ભાજપના ઉમેદવાર પાસેથી જવાબ માંગી શકે છે. જન્મ પ્રમાણપત્ર, શાળાના રેકોર્ડ, પરીક્ષાના પ્રમાણપત્ર અને નામાંકન દસ્તાવેજોની તપાસ થઈ શકે છે. ચૂંટણી પંચનો જવાબ પણ મહત્ત્વનો રહેશે, કારણ કે કોંગ્રેસનું કહેવું છે કે પંચે તપાસ કરવા છતાં વિસંગતિ અંગે કાર્યવાહી કરી નથી. જો માહિતી ખોટી સાબિત થાય, તો ઉમેદવારી રદ થવાનો પ્રશ્ન ઊભો થશે, પરંતુ ભૂલનું સ્વરૂપ અને ચૂંટણી કાયદા હેઠળ તેનું પરિણામ શું થશે, તે કોર્ટ નક્કી કરશે.