મુંબઈમાં દિવંગત અભિનેતા નાના પાટેકરની પ્રાર્થના સભાનું આયોજન કરવામાં આવ્યું હતું. મહારાષ્ટ્ર સરકારે બુધવારે પ્રભાદેવી સ્થિત પી.એલ. દેશપાંડે મહારાષ્ટ્ર કલા અકાદમીમાં આ કાર્યક્રમનું આયોજન કર્યું હતું. આ કાર્યક્રમનું નામ 'આઠવણીતલે નાના' રાખવામાં આવ્યું હતું. પ્રાર્થના સભા બાદ નાના પાટેકરની ફિલ્મનું વિશેષ સ્ક્રીનિંગ પણ યોજાયું હતું.
પ્રાર્થના સભામાં 'સીઆઈડી' ફેમ એક્ટર શિવાજી સાટમ, મરાઠી એક્ટ્રેસ વર્ષા ઉસગાંવકર, અલી ખાન, ડિરેક્ટર મેહુલ કુમાર અને કમિશનર તુકારામ મુંઢે સહિત મનોરંજન જગતની અનેક હસ્તીઓએ હાજરી આપી હતી. તેમણે નાના પાટેકરને શ્રદ્ધાંજલિ આપી હતી. પ્રાર્થના સભામાં એક્ટર નાના પાટેકરની રંગોળી પણ બનાવવામાં આવી હતી.
નાના પાટેકરનું 8 ઓક્ટોબરે ગોવામાં 75 વર્ષની ઉંમરે હૃદયરોગના હુમલાથી અવસાન થયું હતું. તેમને લગભગ 45 મિનિટ સુધી CPR આપવામાં આવ્યું હતું, પરંતુ તેમનો જીવ બચાવી શકાયો નહોતો. ડૉક્ટરના જણાવ્યા મુજબ, તેમની હૃદયની મુખ્ય ધમની (લેફ્ટ મેઇન કોરોનરી આર્ટરી)માં લોહીનો ગઠ્ઠો જામવાથી આ સ્થિતિ સર્જાઈ હતી. પોસ્ટમોર્ટમ રિપોર્ટમાં મોતનું કારણ એથેરોસ્ક્લેરોટિક કોરોનરી આર્ટરી ડિસીઝને કારણે હૃદયની મુખ્ય ધમનીમાં લોહીનો ગઠ્ઠો જામવાથી થયેલો ગંભીર હાર્ટ એટેક હોવાનું જણાવાયું છે. રિપોર્ટ અનુસાર, તેમનું મોત કુદરતી કારણોસર થયું હતું.
નિધન બાદ તેમના પાર્થિવ દેહને થોડા સમય માટે ગોવામાં રાખવામાં આવ્યો હતો અને ત્યારબાદ અંતિમ સંસ્કાર માટે પુણે સ્થિત તેમના ફાર્મહાઉસમાં લઈ જવામાં આવ્યો હતો. ત્યાં યોજાયેલા અંતિમ દર્શનમાં રાજકારણ અને ફિલ્મ જગતની અનેક હસ્તીઓએ હાજરી આપી હતી. મહારાષ્ટ્રના મુખ્યમંત્રી દેવેન્દ્ર ફડણવીસ અને ઉપમુખ્યમંત્રી એકનાથ શિંદે સહિત અનેક મોટા નેતાઓએ પુણે ફાર્મહાઉસમાં પહોંચીને નાના પાટેકરને શ્રદ્ધાંજલિ આપી હતી. ગોવાથી નાના પાટેકરનો પાર્થિવ દેહ પુણે લાવવામાં આવ્યો હતો. અહીં મોડી રાત્રે ડોંજે ગામમાં રાજકીય સન્માન સાથે તેમના અંતિમ સંસ્કાર કરવામાં આવ્યા હતા.
નાના પાટેકરના મૃત્યુના કારણો જાણવા માટે 8 ઑક્ટોબરે બાંબોળી સ્થિત ગોવા મેડિકલ કૉલેજમાં પોસ્ટમોર્ટમ કરવામાં આવ્યું હતું. નાના પાટેકરના નિધનની માહિતી મળ્યા બાદ પણજી પોલીસે પોલીસ સ્ટેશનમાં ભારતીય નાગરિક સુરક્ષા સંહિતા (BNSS), 2023ની કલમ 194 હેઠળ આકસ્મિક મૃત્યુનો કેસ નોંધ્યો હતો.
નાના પાટેકર ભારતીય સિનેમાના એ એક્ટર હતા જેમણે પોતાના સશક્ત અભિનયથી હિન્દી અને મરાઠી સિનેમામાં આગવી ઓળખ બનાવી. તેમણે 'પરિંદા', 'પ્રહાર: ધ ફાઇનલ એક્ટ', 'તિરંગા', 'ક્રાંતિવીર', 'ખામોશી: ધ મ્યુઝિકલ' અને 'વેલકમ' જેવી ફિલ્મોમાં યાદગાર ભૂમિકાઓ ભજવી. તેમની ડાયલોગ બોલવાની શૈલી અને ગંભીર પાત્રોને દર્શકોએ હંમેશાં વખાણ્યા.