નાના પાટેકરના મૃત્યુનું કારણ પોસ્ટમોર્ટમ રિપોર્ટમાં સામે આવ્યું છે. ડૉક્ટરોએ તેમના મૃત્યુને કુદરતી ગણાવ્યું છે.
ટીવી 9 ભારતવર્ષ અનુસાર, પાટેકર કોરોનરી આર્ટરી ડિસીઝ (CAD)થી પીડિત હતા. તેમના હૃદયની મુખ્ય ધમનીમાં લોહીનો ગઠ્ઠો જામવાના કારણે હૃદયના એક મોટા ભાગમાં લોહી વહેતું અટકી ગયું, જેના કારણે તેમને ગંભીર હાર્ટ એટેક આવ્યો. ગંભીર હાર્ટ એટેકની અસરને કારણે અંતે તેમનું હૃદય ધબકવાનું બંધ થઈ ગયું, જેને તબીબી ભાષામાં કાર્ડિયાક અરેસ્ટ કહેવામાં આવે છે. નાના પાટેકરને આશરે 45 મિનિટ સુધી CPR આપવામાં આવ્યું હતું, પરંતુ તેમનો જીવ બચાવી શકાયો નહીં.
નાનાએ નિધનના થોડા કલાકો પહેલાં મિત્રને મેસેજ કર્યો હતો. પોલીસની તપાસમાં જાણવા મળ્યું છે કે નાના પાટેકરે નિધનના થોડા કલાકો પહેલાં પોતાના નજીકના મિત્ર અમેય નાઈકનો સંપર્ક કરવાનો પ્રયાસ કર્યો હતો. તેમણે 8 ઓક્ટોબરની સવારે આશરે 2:30 વાગ્યે વોટ્સએપ પર મેસેજ મોકલીને તબિયત સારી ન હોવાની જાણકારી આપી હતી. ત્યારબાદ તેમણે અમેયને ફોન પણ કર્યો હતો.
પોલીસના જણાવ્યા મુજબ, અમેય નાઈકે નાના પાટેકરનો મેસેજ સવારે લગભગ 3:30 વાગ્યે જોયો. ત્યારબાદ તેઓ તરત જ તેમના ડોના પાવલા સ્થિત ઘરે પહોંચ્યા. ત્યાં તેમણે નાનાને સોફા પર બેભાન હાલતમાં જોયા. પરિસ્થિતિની ગંભીરતા જોતા અમેયે સુરક્ષા ગાર્ડની મદદથી હોસ્પિટલની ઇમર્જન્સી સેવાઓનો સંપર્ક કર્યો. ત્યારબાદ નાના પાટેકરને મણિપાલ હોસ્પિટલ લઈ જવામાં આવ્યા, જ્યાં ડૉક્ટરોએ તેમને મૃત જાહેર કર્યા. મણિપાલ હોસ્પિટલના ડૉ. શેખર સાલકરના જણાવ્યા મુજબ નાના પાટેકરનું સવારે 5:20 વાગ્યે અવસાન થયું.
પોલીસે આકસ્મિક મૃત્યુનો કેસ નોંધ્યો હતો. નાના પાટેકરના મૃત્યુનું કારણ જાણવા માટે 8 ઑક્ટોબરે બાંબોલી સ્થિત ગોવા મેડિકલ કૉલેજમાં પોસ્ટમોર્ટમ કરવામાં આવ્યું. નાના પાટેકરના નિધનના સમાચાર મળ્યા બાદ પણજી પોલીસે પોલીસ સ્ટેશનમાં ભારતીય નાગરિક સુરક્ષા સંહિતા (BNSS), 2023ની કલમ 194 હેઠળ આકસ્મિક મૃત્યુનો કેસ નોંધ્યો હતો.
ગોવાથી નાના પાટેકરનું પાર્થિવ શરીર પુણે લાવવામાં આવ્યું હતું. અહીં મોડી રાત્રે ડોંજેએ ગામમાં રાજકીય સન્માન સાથે તેમના અંતિમ સંસ્કાર કરવામાં આવ્યા હતા. મહારાષ્ટ્રના મુખ્યમંત્રી દેવેન્દ્ર ફડણવીસે પુણે એરપોર્ટ પર નાના પાટેકરને શ્રદ્ધાંજલિ આપી હતી. ફડણવીસે નાના પાટેકરના પુત્ર અને પત્ની સાથે મુલાકાત કરી હતી. ઉપમુખ્યમંત્રી એકનાથ શિંદેએ નાના પાટેકરને પુષ્પાંજલિ અર્પણ કરી હતી.