બોલિવૂડ અને મરાઠી સિનેમાના જાણીતા અભિનેતા નાના પાટેકર (વિશ્વનાથ પાટેકર)નું 75 વર્ષની વયે ગોવામાં હૃદયરોગના હુમલાથી અવસાન થયું છે. ગુરુવારે સવારે તેમના ગોવા સ્થિત ફ્લેટ પર છાતીમાં દુખાવાની ફરિયાદ બાદ તેમને હોસ્પિટલ લઈ જવાઈ રહ્યા હતા, પરંતુ એમ્બ્યુલન્સમાં જ તેમણે અંતિમ શ્વાસ લીધા. તેમના નિધનથી સિનેમા અને રાજકીય જગતમાં શોકની લાગણી ફેલાઈ છે.
ગોવાની મણિપાલ હોસ્પિટલના ઓન્કોલોજી વિભાગના હેડ ડૉ. શેખર સાલકરે ઘટના અંગે માહિતી આપતાં જણાવ્યું કે, 'નાના પાટેકરે રાત્રે 2:30 વાગ્યાની આસપાસ પોતાના એક મિત્રને તબિયત સારી ન હોવાનો મેસેજ કર્યો હતો. મોડી રાત્રે મિત્રની નજર મેસેજ પર પડતાં તેઓ સવારે 4:00 વાગ્યે નાનાના ફ્લેટ પર પહોંચ્યા હતા, જ્યાં તેઓ ભારે પરસેવાથી રેબઝેબ હતા અને હાલત લથડી રહી હતી. તુરંત જ એમ્બ્યુલન્સ અને મેડિકલ ટીમને બોલાવવામાં આવી હતી.'
ડૉક્ટરે વધુમાં કહ્યું કે, 'હોસ્પિટલની ઈમરજન્સી ટીમ ફ્લેટ પર પહોંચી ત્યારે જ નાના અચેતન થઈ ગયા હતા. ટીમે તેમને એમ્બ્યુલન્સમાં જ સીપીઆર (CPR) આપવાનું શરૂ કર્યું હતું. હોસ્પિટલમાં લાવ્યા બાદ પણ ડૉક્ટરોએ સતત 45 મિનિટ સુધી કાર્ડિયાક મસાજ આપી તેમને બચાવવાનો ભારે પ્રયાસ કર્યો હતો, પરંતુ સવારે 5:20 વાગ્યે ડૉક્ટરોએ તેમને મૃત જાહેર કર્યા હતા. આ મામલો મેડિકો-લીગલ કેસ હોવાથી તેમના પાર્થિવ દેહને પોસ્ટમોર્ટમ માટે ગોવા મેડિકલ કોલેજ ખસેડવામાં આવ્યો છે.
1978માં 'ગમન' ફિલ્મથી પોતાની અભિનય કારકિર્દીની શરૂઆત કરનાર નાના પાટેકરે 'પરિંદા', 'ક્રાંતિવીર', 'અગ્નિ સાક્ષી', 'ખામોશી', 'અબ તક છપ્પન', 'વેલકમ' અને 'નટસમ્રાટ' જેવી યાદગાર ફિલ્મોમાં કામ કર્યું હતું. તેમને 3 નેશનલ ફિલ્મ એવોર્ડ અને 'પદ્મશ્રી'થી નવાજવામાં આવ્યા હતા. ફેબ્રુઆરી 2026માં રિલીઝ થયેલી વિશાલ ભારદ્વાજની 'O'Romeo' તેમની છેલ્લી ફિલ્મ સાબિત થઈ. માત્ર અભિનય જ નહીં, પરંતુ 'નામ ફાઉન્ડેશન' દ્વારા મહારાષ્ટ્રના દુષ્કાળગ્રસ્ત ખેડૂતો અને ગ્રામીણ વિસ્તારો માટે તેમણે કરેલું સામાજિક કાર્ય પણ યાદ રહેશે.
વડાપ્રધાન નરેન્દ્ર મોદીએ નાના પાટેકરના નિધન પર દુઃખ વ્યક્ત કરતાં કહ્યું કે ખૂબ ઓછા કલાકારોમાં નાના પાટેકર જેવી ઊંડાઈ અને પોતાની અલગ ઓળખ હતી. તેમણે દરેક પાત્રમાં શાનદાર વિવિધતા અને રચનાત્મકતા બતાવી અને એવા પાત્રો ભજવ્યા જેને આવનારી પેઢીઓ યાદ રાખશે.
મહારાષ્ટ્રના મુખ્યમંત્રી દેવેન્દ્ર ફડણવીસે કહ્યું કે, 'નાના પાટેકર માત્ર પડદા પર જ નહીં પણ પોતાના વ્યક્તિત્વમાં પણ અત્યંત પ્રભાવશાળી હતા. 'ક્રાંતિવીર'થી 'નટસમ્રાટ' સુધીનો તેમનો અભિનય બેમિસાલ રહ્યો. જલયુક્ત શિવાર અભિયાન અને નામ ફાઉન્ડેશન દ્વારા ખેડૂતોની મદદ કરનાર એક સંવેદનશીલ માનવીને આપણે ગુમાવ્યા છે.'
કેન્દ્રીય મંત્રી નિતિન ગડકરીએ નાના પાટેકરને શ્રદ્ધાંજલિ આપતા કહ્યું કે, 'નાના પાટેકરના નિધનના સમાચાર અત્યંત ચોંકાવનારા છે. તેમની સાથે મારા કૌટુંબિક સંબંધો હતા. પોતાના ખાસ અંદાજમાં ડાયલોગ ડિલિવરી કરીને તેમણે અનેક પાત્રોને અમર બનાવી દીધા. મહારાષ્ટ્રના ગ્રામીણ જળ સંચય અને...