બોલિવૂડ અભિનેત્રી યામી ગૌતમ ધર ફરી એકવાર મોટા પડદે દર્શકોને ચોંકાવવા તૈયાર છે. એમેઝોન એમજીએમ સ્ટુડિયોઝ અને કલર યલો પ્રોડક્શન્સે બુધવારે તેમની આગામી ફેન્ટસી-ફેમિલી એન્ટરટેઇનર ફિલ્મ 'નઈ નવેલી'નું સત્તાવાર ટ્રેલર રિલીઝ કર્યું છે. ટ્રેલરમાં યામીનો અત્યાર સુધીનો સૌથી અનોખો અને રહસ્યમયી અવતાર જોવા મળે છે.
ફિલ્મની વાર્તા મેરઠના પાર્શ્વભૂમિ પર અવસ્થી પરિવારની આસપાસ ફરે છે. ઘરમાં નવી વહુ મોહિની (યામી ગૌતમ)ના પ્રવેશ સાથે જ અણધાર્યા બનાવો શરૂ થાય છે. જ્યારે પરિવારમાં ચર્ચા થાય છે કે 'નવી ભાભી ડાકણ છે', ત્યારે વાર્તા હાસ્ય, રહસ્ય અને રોમાંચ તરફ વળે છે. લગ્નની પરંપરાગત વિધિઓ અને પારિવારિક નોક-ઝોંક વચ્ચે શરૂ થયેલી આ કહાની ધીમે ધીમે એક ભવ્ય જાદુઈ-કાલ્પનિક દુનિયાના દરવાજા ખોલે છે, જેમાં એક્શન અને કોમેડીનું મિશ્રણ જોવા મળે છે.
પોતાના પાત્ર વિશે વાત કરતાં યામી ગૌતમ ધરે જણાવ્યું, 'મોહિની સામાન્ય વહુઓ જેવી નથી. તેનામાં એક તરફ પારિવારિક આત્મીયતા છે, તો બીજી તરફ એક મોટું રહસ્ય છુપાયેલું છે. આ પાત્ર ભાવનાઓ, જાદુઈ દુનિયા અને એક્શન વચ્ચે સંતુલન જાળવી રાખે છે. દર્શકોને આ અનોખી સફર પર લઈ જવા હું ખૂબ ઉત્સાહિત છું.'
ફિલ્મના દિગ્દર્શક બાલાજી મોહને જણાવ્યું, 'આ ફિલ્મ એક એવા પરિવારથી શરૂ થાય છે જે દરેક સામાન્ય ભારતીય ઘર જેવો લાગે છે. પરંતુ આગળ જતાં વાર્તા એવો અણધાર્યો વળાંક લે છે જે દર્શકોને હસાવવાની સાથે સ્તબ્ધ કરી દેશે. સમગ્ર કાસ્ટે શાનદાર અભિનય કર્યો છે અને યામીનું રહસ્યમયી રૂપ સ્ક્રીન પર છવાઈ જશે.'
હિમાંશુ શર્મા અને દિવ્ય નિધિ શર્મા દ્વારા લિખિત તથા જી.વી. પ્રકાશ કુમારના સંગીતથી સજ્જ આ ફિલ્મ તહેવારોની મોસમમાં સિનેમાઘરોમાં આવી રહી છે. 'નઈ નવેલી' આગામી 16 ઓક્ટોબર, 2026ના રોજ દશેરાના પાવન પર્વે વિશ્વભરના સિનેમાઘરોમાં રિલીઝ થશે.