મુંબઈ ઈન્ડિયન્સે શુક્રવારે તેના કોચિંગ સ્ટાફમાં ફેરફારની જાહેરાત કરી છે. પૂર્વ ભારતીય ક્રિકેટર રોબિન ઉથપ્પાને ટીમના બેટિંગ કોચ બનાવવામાં આવ્યા છે. આ ફેરફાર આગામી મિની ઓક્શન પહેલાં કરવામાં આવ્યો છે.
ટીમે ન્યૂઝીલેન્ડના પૂર્વ ઝડપી બોલર મિચેલ મેક્લેનાઘનને બોલિંગ કોચ, ટી. દિલીપને ફિલ્ડિંગ કોચ અને ધવલ કુલકર્ણીને ડેવલપમેન્ટ બોલિંગ કોચની જવાબદારી સોંપી છે.
થોડા દિવસ પહેલાં જ ફ્રેન્ચાઇઝીએ કિરોન પોલાર્ડને હેડ કોચ બનાવ્યા હતા. મુંબઈ ઈન્ડિયન્સ છેલ્લા છ વર્ષથી ટ્રોફીની રાહ જોઈ રહ્યું છે. ટીમે 2020માં છેલ્લી વખત IPL ખિતાબ જીત્યો હતો.
IPL 2027 માટે ખેલાડીઓનું ઓક્શન 16 ડિસેમ્બરે ગોવામાં યોજાવાનું છે. તે પહેલાં તમામ ટીમોએ 15 નવેમ્બર સુધી પોતાના રિટેન અને રિલીઝ કરવાના ખેલાડીઓની યાદી સુપરત કરવાની છે.
રોબિન ઉથપ્પા 2008માં મુંબઈ ઈન્ડિયન્સ માટે રમ્યા હતા. હવે બેટિંગ કોચ તરીકે તેઓ બેટરોની ટેકનિક સુધારવા અને મેચ દરમિયાન સ્ટ્રેટેજી ઘડવાનું કામ સંભાળશે.
મિચેલ મેક્લેનાઘન 2015થી 2020 સુધી મુંબઈ ઈન્ડિયન્સનો હિસ્સો રહ્યા હતા. તેમણે ટીમ સાથે 2015, 2017, 2019 અને 2020માં IPL ખિતાબ જીત્યા છે. બોલિંગ કોચ તરીકે તેઓ બોલરોને ટી-20 ક્રિકેટની જરૂરિયાત મુજબ તૈયાર કરશે.
ટી. દિલીપ ટીમના ફિલ્ડિંગ વિભાગની જવાબદારી સંભાળશે. ધવલ કુલકર્ણી ડેવલપમેન્ટ બોલિંગ કોચ તરીકે બોલરોને તૈયાર કરવા અને તેમની ક્ષમતા સુધારવા પર ધ્યાન આપશે. આ નિમણૂકો સાથે ટીમે IPL 2027 પહેલાં કોચિંગ સ્ટાફનું નવું ગઠન કર્યું છે.
ઉલ્લેખનીય છે કે મુંબઈ ઈન્ડિયન્સે 24 ઓક્ટોબરે કિરોન પોલાર્ડને IPL 2027 માટે પુરુષ ટીમના હેડ કોચ તરીકે નિયુક્ત કર્યા હતા. 39 વર્ષીય પોલાર્ડ છેલ્લા 16 વર્ષથી મુંબઈ ઈન્ડિયન્સ સાથે જોડાયેલા છે. તેઓ 2009-10માં ટીમમાં જોડાયા હતા અને 2022 સુધી આ ફ્રેન્ચાઇઝી માટે રમ્યા હતા. ખેલાડી તરીકે તેમણે ટીમ સાથે પાંચ IPL ખિતાબ જીત્યા છે.