મુંબઈ પોલીસે 2 ઑક્ટોબરે શિવાજી પાર્ક ખાતે CJPના વિરોધ-પ્રદર્શન અંગે આયોજકો અને 400થી 500 જેટલા અજાણ્યા પ્રદર્શનકારીઓ સામે ગુનો નોંધ્યો છે. શિવાજી પાર્ક પોલીસ સ્ટેશનમાં ક્રાઇમ નંબર 515/26 હેઠળ દાખલ આ કેસમાં ભારતીય ન્યાય સંહિતા (BNS)ની કલમ 189 અને 223 તથા મહારાષ્ટ્ર પોલીસ ઍક્ટની કલમ 37(1)(3)/135 હેઠળ કાર્યવાહી કરવામાં આવી છે.
આ કેસ આયોજકો ઉપરાંત 400થી 500 અજાણ્યા સહભાગીઓ સામે પણ નોંધાયો છે. પોલીસે કાયદેસરની તપાસ શરૂ કરી છે.
અલગથી, આ પ્રદર્શનમાં સગીર બાળકોની કથિત સંડોવણી અને સોશિયલ મીડિયા પર તેમના ફોટા તથા વીડિયો વાયરલ થવાના મામલે રાષ્ટ્રીય માનવાધિકાર આયોગ (NHRC)એ ગંભીર નોંધ લીધી છે. આયોગે માનવાધિકાર સંરક્ષણ અધિનિયમ, 1993ની કલમ 12 હેઠળ આ સંજ્ઞાન લીધી છે.
આ અંગેની ફરિયાદ સેવા ન્યાય ઉત્થાન ફાઉન્ડેશનના હેડ ઓફ ઇન્ટરવેન્શન સતીશ વૈદે નોંધાવી હતી. ફરિયાદ બાદ NHRCએ મુંબઈ પોલીસ કમિશનર, કેન્દ્રીય ઇલેક્ટ્રોનિક્સ અને માહિતી ટૅક્નોલૉજી મંત્રાલય, ભારત સ્થિત સોશિયલ મીડિયા એકાઉન્ટ Xના ફરિયાદ અધિકારી અને મહારાષ્ટ્ર સરકારના મહિલા અને બાળ વિકાસ વિભાગના પ્રધાન સચિવને નોટિસ પાઠવી છે.
આયોગે મુંબઈ પોલીસને ડિજિટલ પુરાવાઓની ઝીણવટભરી તપાસ કરી, યોગ્ય ગુનો બનતો હોય તો તાત્કાલિક FIR નોંધવા સૂચના આપી છે. સાથે જ, બાળકો કયા સંજોગોમાં આ પ્રદર્શનમાં સામેલ થયા અને આયોજકો, સંયોજકો તથા તેમની સાથે હાજર પુખ્ત વ્યક્તિઓની શું ભૂમિકા હતી તે અંગે તપાસ કરવા કહ્યું છે. સંબંધિત ઉચ્ચ અધિકારીઓને એક સપ્તાહમાં એક્શન ટેકન રિપોર્ટ (ATR) રજૂ કરવાનો આદેશ પણ આપવામાં આવ્યો છે.