વડોદરાની મહારાજા સયાજીરાવ યુનિવર્સિટી (MS યુનિવર્સિટી)ની હોસ્ટેલમાં આપવામાં આવતા ભોજનની ગુણવત્તા અંગે ફરી એકવાર પ્રશ્નો ઉઠ્યા છે. હોસ્ટેલના ભોજનનો એક વીડિયો સોશિયલ મીડિયા પર વાયરલ થયા બાદ આ મામલો ચર્ચામાં આવ્યો છે.
વાયરલ વીડિયોમાં એક વિદ્યાર્થિની હોસ્ટેલમાં આપવામાં આવતા ભોજનની ગુણવત્તા અંગે સવાલો ઉઠાવતી જોવા મળે છે. વિદ્યાર્થિનીએ રોટલી સહિતની કેટલીક ખાદ્ય વસ્તુઓની ગુણવત્તા અંગે પણ પ્રશ્નો ઉઠાવ્યા હોવાનું સામે આવ્યું છે.
વાયરલ વીડિયોમાં હોસ્ટેલનું ભોજન ખાધા બાદ કેટલીક વિદ્યાર્થિનીઓ બીમાર પડતી હોવાનો દાવો કરવામાં આવ્યો છે. જોકે, આ દાવાની સત્તાવાર પુષ્ટિ થઈ છે કે નહીં તે અંગેની માહિતી સામે આવી નથી. આ મામલે યુનિવર્સિટી તંત્ર તરફથી સત્તાવાર સ્પષ્ટતા અથવા કાર્યવાહી અંગેની વિગતોની રાહ જોવાઈ રહી છે.
મહત્વનું છે કે થોડા દિવસ અગાઉ પણ હોસ્ટેલના ભોજનની ગુણવત્તાને લઈને ચકાસણી કરવામાં આવી હતી. ચકાસણી બાદ પણ હવે ફરી ભોજનની ગુણવત્તા મુદ્દે વિવાદ ઊભો થતાં હોસ્ટેલમાં વિદ્યાર્થીઓને આપવામાં આવતા ભોજનની વ્યવસ્થા સામે સવાલો ઉઠી રહ્યા છે.
હવે વાયરલ થયેલા વીડિયોને પગલે જવાબદાર તંત્ર દ્વારા સમગ્ર મામલે શું તપાસ કરવામાં આવે છે અને ભોજનની ગુણવત્તા અંગે કોઈ કાર્યવાહી કરવામાં આવે છે કે નહીં, તે જોવું રહ્યું.