મધ્યપ્રદેશમાં લોકાયુક્તે સાતપુડા ટાઈગર રિઝર્વના ડેપ્યુટી ડાયરેક્ટર સંજીવ કુમાર શર્માના ભોપાલ, પંચમઢી અને છિંદવાડા સ્થિત રહેઠાણો પર દરોડા પાડ્યા છે. તપાસમાં તેમની આવક કરતાં 560 ટકા વધુ, એટલે કે આશરે 7.6 કરોડ રૂપિયાની અપ્રમાણસર સંપત્તિ મળી આવી છે.
દરોડામાં 3.5 કરોડ રૂપિયાનું સોનું, રોકડ, બે રિસોર્ટ અને વાહનો સહિતની મિલકતો જપ્ત કરવામાં આવી છે. અધિકારી સામે ભ્રષ્ટાચાર નિવારણ કાયદા હેઠળ કેસ નોંધાયો છે.
મધ્યપ્રદેશ લોકાયુક્તના સ્પેશિયલ પોલીસ એસ્ટાબ્લિશમેન્ટ (SPE)એ શનિવારે આ કાર્યવાહી કરી હતી. ભોપાલની પ્રોફેસર કોલોની ઉપરાંત પંચમઢી અને છિંદવાડામાં આવેલી સરકારી તથા ખાનગી મિલકતો પર એકસાથે તપાસ હાથ ધરવામાં આવી હતી. ગુપ્ત માહિતી અને કોર્ટ પાસેથી મેળવેલા સર્ચ વોરંટના આધારે આ દરોડા પાડવામાં આવ્યા હતા.
પ્રાથમિક તપાસમાં અધિકારીની સંપત્તિ આવક કરતાં 228 ટકા વધુ હોવાનો અંદાજ હતો. જોકે, તપાસ આગળ વધતાં આ આંકડો વધીને 560 ટકા એટલે કે આશરે 7.6 કરોડ રૂપિયા થયો હતો. તપાસમાં પોતાની, પત્ની અને અન્ય લોકોનાં નામે સંપત્તિ એકઠી કરવામાં આવી હોવાની વિગતો પણ સામે આવી છે.
દરોડા દરમિયાન અધિકારીનાં ઠેકાણેથી 26,36,800 રૂપિયા રોકડા મળી આવ્યા હતા. આ ઉપરાંત 2.528 કિલો સોનું, જેની કિંમત આશરે 3.5 કરોડ રૂપિયા છે, અને 1.656 કિલો ચાંદી મળી હતી. ચાંદીની કિંમત 2.94 લાખ રૂપિયા આંકવામાં આવી છે.
તપાસમાં આશરે 2 કરોડ રૂપિયાની કિંમતનો 'ઇકોટેલ રિસોર્ટ' અને 1 કરોડ રૂપિયાની કિંમતનો 'સેરેનિટી ધ વિલા' પણ મળી આવ્યા છે. ચાર વાહનોમાં મહિન્દ્રા સ્કોર્પિયો, મહિન્દ્રા KUV, રોયલ એનફિલ્ડ બુલેટ અને સ્કૂટરનો સમાવેશ થાય છે. તેમની કુલ કિંમત આશરે 31.2 લાખ રૂપિયા છે. આ ઉપરાંત 50 લાખ રૂપિયાની ઘરવપરાશની વસ્તુઓ અને જમીનના ખરીદ-વેચાણ સંબંધિત 28 દસ્તાવેજો પણ મળ્યા છે. દસ્તાવેજોના મૂલ્યાંકન બાદ સંપત્તિનો આંકડો વધી શકે છે.
લોકાયુક્તના ડિરેક્ટર જનરલ યોગેશ દેશમુખના નિર્દેશ અને ડીઆઈજી મનોજ કુમાર સિંહના માર્ગદર્શન હેઠળ આ કાર્યવાહી કરવામાં આવી હતી. અધિકારી સામે પ્રિવેન્શન ઓફ કરપ્શન એક્ટ, 1988ની કલમ 13(1)(B) અને 13(2) હેઠળ ગુનો નોંધવામાં આવ્યો છે.
આ પહેલાં 4 નવેમ્બરે લોકાયુક્તે ધાર જિલ્લાના નાલચામાં આદિમ જાતિ સેવા સહકારી સમિતિના મેનેજર શેર સિંહ ઠાકુર સામે પણ કાર્યવાહી કરી હતી. 20 વર્ષની નોકરીમાં આશરે 65 લાખ રૂપિયાનો પગાર મેળવ્યો હોવા છતાં તેમની પાસે 2.41 કરોડ રૂપિયાની મિલકતો મળી આવી હતી. તેમાં મકાન, કોમર્શિયલ બિલ્ડિંગ, ખેતીની જમીન, અર્થ-મૂવિંગ મશીન અને શંકાસ્પદ બેનામી ઇમારતનો સમાવેશ થાય છે. તેમની સામે પણ ભ્રષ્ટાચાર નિવારણ કાયદા હેઠળ કેસ નોંધાયો છે.