સાયબર ઠગ વડાપ્રધાન-મુખ્યમંત્રીના ડીપફેક ફોટાથી છેતરપિંડી કરી રહ્યા, ગૃહ મંત્રાલયની ચેતવણી

નવી દિલ્હી: ગૃહ મંત્રાલય હેઠળના ભારતીય સાયબર ક્રાઇમ કોઓર્ડિનેશન સેન્ટર (I4C) ના રાષ્ટ્રીય સાયબર ક્રાઇમ થ્રેટ એનાલિટિક્સ યુનિટે ચેતવણી જારી કરી છે કે સાયબર ઠગ વડાપ્રધાન, નાણામંત્રી અને રાજ્યોના મુખ્યમંત્રીઓના નામ અને ડીપફેક વીડિયોનો ઉપયોગ કરીને લોકોને છેતરી રહ્યા છે.

એડવાઈઝરી મુજબ, ઠગ ફેસબુક અને ઇન્સ્ટાગ્રામ પર નકલી જાહેરાતો આપે છે, જેમાં સરકારી યોજનાઓ હેઠળ મોટી નાણાકીય સહાયનું વચન આપે છે. આ જાહેરાતોમાં નેતાઓના ફોટા અને વીડિયોનો ઉપયોગ થાય છે, જેથી લોકો તેને સાચી માની લે છે.

ત્યારબાદ ઠગ પીડિતોને સરકારી ટેક્સ, પ્રોસેસિંગ ફી કે રજિસ્ટ્રેશન ચાર્જના બહાને પૈસા ભરવા કહે છે. કેટલાક કિસ્સામાં સ્ક્રેચ કાર્ડ અને 'સ્પિન-એન્ડ-વિન' જેવી લોભામણી યોજનાઓ દ્વારા પણ લોકોને ફસાવવામાં આવે છે.

ઠગ લોકોને કેશબેકનું વચન આપીને UPI કલેક્શન રિક્વેસ્ટ મોકલે છે અને તેને મંજૂર કરવા દબાણ કરે છે. આ રીતે તેઓ લોકોના બેંક ખાતામાંથી પૈસા ઉપાડી લે છે.

એડવાઈઝરીમાં ખાસ કરીને પાકિસ્તાની +92 નંબરો પરથી આવતા કોલ્સ અને વોટ્સએપ સંદેશાઓથી સાવધાન રહેવા જણાવાયું છે. સરકારી યોજનાઓ સંબંધિત વિભાગની અધિકૃત વેબસાઇટ પરથી ચકાસવા અને અજાણ્યા વ્યક્તિઓ સાથે આધાર, પાન, બેંક વિગતો, OTP કે UPI પિન શેર ન કરવા સૂચના આપવામાં આવી છે.

સાયબર છેતરપિંડી થાય તો 1930 હેલ્પલાઇન પર કોલ કરીને અથવા https://cybercrime.gov.in પર ફરિયાદ નોંધાવી શકાય છે.