માર્ક ઝુકરબર્ગની કંપની મેટાએ તેના વાર્ષિક ઇવેન્ટમાં નવા સ્માર્ટ ચશ્માં અને વર્ચ્યુઅલ રિયાલિટી (VR) ડિવાઇસ રજૂ કર્યા છે. આ ઉપકરણો દ્વારા વપરાશકર્તાઓ ઘરે બેઠા જ IMAX થિયેટર જેવો અનુભવ મેળવી શકશે, માત્ર બોલવાથી શોપિંગ કરી શકશે અને ટિકિટ તથા એપોઇન્ટમેન્ટ બુક કરી શકશે.
મેટાએ ચાર મુખ્ય ઉત્પાદનો રજૂ કર્યા છે:
1. કેમેરા વગરના રે-બેન મેટા ઓડિયો AI ચશ્માં: સ્માર્ટ ચશ્માંમાં કેમેરાને કારણે ગુપ્ત રેકોર્ડિંગની ચિંતા હોય છે. તેના ઉકેલ માટે મેટાએ કેમેરા વગરના ચશ્માં લોન્ચ કર્યા છે. તેમાં ફક્ત માઇક્રોફોન અને સ્પીકર છે, જેનાથી સંગીત સાંભળી શકાય, કૉલ કરી શકાય અને મેટા AI આસિસ્ટન્ટનો ઉપયોગ કરી શકાય.
2. ડોલ્બી એટમોસ સાથે રે-બેન મેટા જન 3: ફોટો-વીડિયોના શોખીનો માટે કેમેરાવાળા ચશ્માંનું નવું વર્ઝન. તેમાં પહેલા કરતાં સારી બેટરી લાઇફ (9 કલાક સુધી) અને ડોલ્બી એટમોસ ઓડિયો સપોર્ટ છે.
3. 100 ગ્રામ વજનવાળા મેટા VR ગ્લાસિસ: મેટાએ ક્વેસ્ટ હેડસેટની જગ્યાએ હળવા VR ચશ્માં રજૂ કર્યા છે. તે દેખાવમાં સામાન્ય ચશ્માં જેવા છે અને એપલના વિઝન પ્રોને ટક્કર આપે છે. વજન ઓછું રાખવા બેટરી અને પ્રોસેસર 300 ગ્રામના અલગ ડિવાઇસમાં છે. તેમાં 5K સ્ક્રીન છે, જેના પર સ્પષ્ટ ટેક્સ્ટ વાંચી શકાય છે અને 3Dમાં IMAX જેવો સિનેમા અનુભવ મળે છે. તેને કમ્પ્યુટર કે મેક સાથે જોડીને અનેક વર્ચ્યુઅલ વિન્ડો પર કામ પણ કરી શકાય. બેટરી લાઇફ લગભગ 3 કલાકની છે.
4. મેટા ચાર્મ: મ્યુઝ AI આસિસ્ટન્ટ ચલાવવા માટે નાનું ગેજેટ. તે એપલ એરપોડ્સ કેસ જેટલું નાનું છે, જેમાં 2-ઇંચની ટચસ્ક્રીન અને 5G કનેક્ટિવિટી છે. તે ડિસેમ્બર સુધીમાં વેચાણ માટે ઉપલબ્ધ થશે, પરંતુ કિંમત જાહેર થઈ નથી. ઝુકરબર્ગે કહ્યું, "અમે રિયલ-ટાઇમ વૉઇસ અને અવતાર ફીચર સહિતનો સંપૂર્ણ મ્યુઝ અનુભવ નાના ગેજેટમાં પેક કર્યો છે. તે તમારી કી-ચેનમાં સરળતાથી આવી જાય છે અને તમારી સાથે વાત કરવા હંમેશાં ઉપલબ્ધ રહે છે."
મેટાએ મ્યુઝ AI આસિસ્ટન્ટને તમામ સ્માર્ટ ગ્લાસ સાથે જોડ્યો છે. હવે વપરાશકર્તાઓએ ખરીદી કે સેવા બુક કરવા ફોન કાઢવાની જરૂર નથી. તેઓ ચશ્માંને બોલીને કામ કરાવી શકશે. ડૉક્ટરની મુલાકાત, સલૂન બુકિંગ જેવી અપોઇન્ટમેન્ટ આપમેળે થઈ જશે. એલાર્મ, રિમાઇન્ડર, મેસેજ મોકલવો કે માહિતી શોધવી જેવા કામ પણ માત્ર બોલવાથી થશે. આ AI ચશ્માંને પર્સનલ અસિસ્ટન્ટ બનાવે છે, જેથી હાથના ઉપયોગ વગર ડિજિટલ કામ પૂરા થાય.
મેટાએ જણાવ્યું કે એક વર્ષ પહેલાં રજૂ કરાયેલા મેટા રે-બેન ડિસ્પ્લે ચશ્માં હવે અમેરિકાની બહાર પણ વેચાણ માટે ઉપલબ્ધ થશે. તેના જમણા લેન્સમાં વર્ચ્યુઅલ ડિસ્પ્લે મળે છે.