મેરઠમાં પતિની હત્યા કરીને મૃતદેહના ટુકડા કરી બ્લૂ ડ્રમમાં સિમેન્ટ સાથે છુપાવવાના કેસમાં કોર્ટે બુધવારે મુસ્કાન અને તેના પ્રેમી સાહિલને હત્યાના દોષી ઠેરવ્યા છે. કોર્ટે માન્યું કે બંનેએ મળીને સૌરભની હત્યા કરી હતી.
ઘટનાના 576 દિવસ બાદ અને 126 તારીખો દરમિયાન 22થી વધુ સાક્ષીઓના નિવેદનો નોંધાયા પછી કોર્ટે ચુકાદો આપ્યો. સજાની જાહેરાત 15 દિવસ બાદ કરવામાં આવશે.
હત્યા 3 માર્ચ, 2025ના રોજ થઈ હતી. જુલાઈ 2025માં જિલ્લા ન્યાયાધીશની કોર્ટમાં ટ્રાયલ શરૂ થયો હતો. પોલીસે 1,000 પાનાંની ચાર્જશીટ દાખલ કરી હતી. 19 સપ્ટેમ્બરે કોર્ટે નિર્ણય અનામત રાખ્યો હતો.
ચુકાદા પહેલાં મુસ્કાન અને સાહિલ બેચેન હતા. મુસ્કાન છેલ્લા 3 દિવસથી જેલમાં પૂજા કરી રહી હતી. સાહિલે સાથી કેદીઓ સાથે વાતચીત બંધ કરી દીધી હતી અને જેલ કર્મચારીઓને ચુકાદા વિશે પૂછી રહ્યો હતો.
જજ અરવિંદ મિશ્રાએ કહ્યું- તમામ પુરાવાઓને ધ્યાનમાં લેતા આ સાબિત થઈ ચૂક્યું છે કે તમે બંનેએ જ સૌરભની હત્યા કરી હતી. હત્યા બાદ પુરાવા નષ્ટ કરવા માટે મૃતદેહને વાદળી ડ્રમમાં ભરી દીધો હતો. તેથી સૌરભ હત્યાકાંડમાં તમે બંને દોષી ઠર્યા છો. પરંતુ, અમે તમને તમારી વાત કહેવાની તક આપીશું. સજાની જાહેરાત 15 દિવસ બાદ કરીશું.
સૌરભ મર્ચન્ટ નેવીમાં અધિકારી હતો. તે 24 ફેબ્રુઆરી 2025ના રોજ લંડનથી પરત ફરીને મેરઠ આવ્યો હતો. પત્ની મુસ્કાન રસ્તોગીએ 3 માર્ચ, 2025ના રોજ પોતાના બોયફ્રેન્ડ સાહિલ શુક્લા સાથે મળીને પહેલાં ભોજનમાં દવા ભેળવીને તેને બેભાન કર્યો. ત્યારબાદ બેડરૂમમાં સૂતા સમયે પતિની છાતીમાં છરી મારીને તેની હત્યા કરી નાખી.
મોત બાદ લાશને બાથરૂમમાં લઈ ગયા. ત્યાં સાહિલે બંને હાથ અને માથું કાપીને ધડથી અલગ કરી દીધા. લાશને ઠેકાણે લગાવવા માટે પ્લાસ્ટિકના ડ્રમમાં ટુકડા નાખ્યા, પછી તેમાં સિમેન્ટનું મિશ્રણ ભરી દીધું. પરિવાર અને પડોશીઓને ગેરમાર્ગે દોરવા માટે મુસ્કાન શિમલા-મનાલી જતી રહી.
13 દિવસ સુધી તે ઇન્સ્ટાગ્રામ પર વીડિયો-ફોટા અપલોડ કરતી રહી, જેથી લોકો એવું જ માનતા રહે કે તેઓ ફરવા ગયા છે. આ હત્યાનો ભેદ ત્યારે ખુલ્યો, જ્યારે 18 માર્ચે સૌરભનો નાનો ભાઈ રાહુલ પોતાના ભાઈના ઘરે પહોંચ્યો. ત્યાં તેણે મુસ્કાનને એક યુવક (સાહિલ) સાથે ફરતા જોઈ.
ભાઈ ક્યાં છે? એવું પૂછતાં મુસ્કાન સાચો જવાબ આપી શકી નહીં. ઘરની અંદરથી દુર્ગંધ પણ આવી રહી હતી. રાહુલે બૂમાબૂમ કરતાં પડોશીઓ પણ એકઠા થઈ ગયા. પોલીસ આવી ત્યારે હત્યાની જાણ થઈ. પોલીસ કસ્ટડીમાં મુસ્કાન અને સાહિલે હત્યાની આખી કહાની સંભળાવી.