ઉત્તર પ્રદેશના મેરઠમાં એક ગંભીર અકસ્માતની ઘટના સામે આવી છે, જેમાં પૂરપાટ ઝડપે આવેલી એક સફેદ કારે શેરીમાં રમી રહેલા બે નાના બાળકોને કચડી નાખ્યા હતા. આ ઘટના નજીકના સીસીટીવી કેમેરામાં કેદ થઈ ગઈ છે અને હાલમાં તે ફૂટેજ સોશિયલ મીડિયા પર ઝડપથી વાયરલ થઈ રહ્યું છે.
સીસીટીવી ફૂટેજ અનુસાર, મેરઠની એક રહેણાંક શેરીમાં બે નાના બાળકો રસ્તા પર બેસીને નિરાંતે રમતા હતા. તેઓ પોતાની રમતમાં એટલા મશગૂલ હતા કે આસપાસનું ધ્યાન નહોતું રહ્યું. તે જ સમયે એક સફેદ કાર વળાંક લઈને શેરીમાં દાખલ થઈ. ચાલકે વાહનની ઝડપ ધીમી કરી નહીં અને રસ્તા પર બેઠેલા બાળકોને જોયા વગર કાર તેમની પર ચઢાવી દીધી.
બાળકો કાર નીચે આવતાં જ જોરદાર અવાજ થયો, અને ચાલકને સમજાયું કે વાહન નીચે કંઈક આવી ગયું છે. તેણે તરત જ કાર રોકી દીધી. બાળકોની ચીસો સાંભળીને નજીકના રહેવાસીઓ અને પરિવારજનો દોડી આવ્યા. લોકોએ બાળકોને કાર નીચેથી બહાર કાઢીને ગંભીર હાલતમાં હોસ્પિટલ ખસેડ્યા છે.
આ ઘટના બાદ ચાલકની બેદરકારી સામે લોકોમાં ભારે રોષ જોવા મળી રહ્યો છે. સોશિયલ મીડિયા પર વીડિયો ફરતો થતાં ઘણા યુઝર્સે ચાલક સામે કડકમાં કડક કાર્યવાહીની માંગ કરી છે. એક યુઝરે લખ્યું કે ચાલક ફોનમાં વ્યસ્ત હતો, તો બીજાએ શંકા વ્યક્ત કરી કે તે નશામાં હતો. સાંકડી શેરીઓમાં આટલી બેદરકારીથી વાહન ચલાવવું જીવલેણ બની શકે છે, તેવી ચિંતા પણ લોકોએ વ્યક્ત કરી છે.