ભારતની સૌથી મોટી કાર નિર્માતા કંપની મારુતિ સુઝુકીએ ઇલેક્ટ્રિક વાહન સેગમેન્ટમાં પોતાની પહેલી ઇલેક્ટ્રિક એસયુવી ઈ-વિટારા લોન્ચ કરવાની તૈયારી કરી છે. ભારતમાં બનેલી આ કારે લોન્ચ પહેલા જ ગ્રાહકોના ધ્યાનનું કેન્દ્ર બની છે. તાજેતરમાં જ કારે જાપાન ન્યૂ કાર એસેસમેન્ટ પ્રોગ્રામ (JNCAP) ક્રેશ ટેસ્ટમાં ભાગ લીધો હતો, જેમાં તેણે એકંદરે 4-સ્ટાર સેફ્ટી રેટિંગ મેળવ્યું છે.
જાપાન NCAPના આ મૂલ્યાંકનમાં ઈ-વિટારાને નિવારક સલામતી (Preventive Safety) વિભાગમાં સૌથી ઊંચો 'A' રેન્ક આપવામાં આવ્યો છે, જ્યારે અથડામણ સુરક્ષા (Collision Safety)માં 'B' રેન્ક મળ્યો છે. કારની ઓટોમેટિક ઇમરજન્સી એક્સિડન્ટ રિપોર્ટિંગ સિસ્ટમને ટાઇપ-2 શ્રેણીમાં વિશેષ સ્થાન આપવામાં આવ્યું છે.
એડવાન્સ્ડ ડ્રાઇવિંગ આસિસ્ટન્સ સિસ્ટમ (ADAS)ની કામગીરીમાં કારે ઉચ્ચતમ 5 રેટિંગ મેળવ્યું છે. તેમાં દિવસ અને રાત દરમિયાન કામ કરતું ઓટોમેટિક ઇમરજન્સી બ્રેકિંગ, સાયકલ સવારોની સુરક્ષા, હાઇ-પર્ફોર્મન્સ હેડલાઇટ અને લેન-ડિપાર્ચર પ્રિવેન્શન જેવા ફીચર્સનો સમાવેશ થાય છે. આ તમામ ફીચર્સ અને એક્સિલરેશન સપ્રેશન સિસ્ટમ (ભૂલથી પેડલ દબાઈ જવા સામે રક્ષણ)ને પૂરા 5 પોઇન્ટ્સ આપવામાં આવ્યા છે. જોકે, ટ્રાફિકવાળા ક્રોસિંગ અને આંતરછેદો પર વળાંક લેવા જેવા કેટલાક જટિલ દૃશ્યોમાં કારનો સ્કોર લેવલ 2 થી લેવલ 4 વચ્ચે રહ્યો છે.
ફુલ-વિથ ફ્રન્ટલ ઇમ્પેક્ટ ટેસ્ટ (સામેથી થતી સીધી ટક્કર)માં ડ્રાઇવરની સલામતી માટે કારને સૌથી વધુ લેવલ 5 રેટિંગ અને પાછળ બેઠેલા મુસાફરોની સુરક્ષા માટે લેવલ 4 સ્કોર મળ્યો છે. સાઇડ-ઇમ્પેક્ટ પ્રોટેક્શન અને પાછળથી થતી ટક્કર વખતે ગરદનનું રક્ષણ કરતા વ્હિપ્લેશ પ્રોટેક્શનમાં પણ કારે ડ્રાઇવર અને આગળના મુસાફર બંને માટે 5 રેટિંગ મેળવ્યું છે. રાહદારીઓની સુરક્ષામાં માથાના રક્ષણ માટે લેવલ 3 અને પગના રક્ષણ માટે લેવલ 5 સ્કોર મળ્યો છે.
અહીં એ સમજવું જરૂરી છે કે જાપાન NCAP અને ભારત NCAP (Bharat NCAP)ના ધોરણો અલગ-અલગ છે, તેથી બંનેના રેટિંગની સીધી સરખામણી કરવી યોગ્ય નથી. ભારતમાં બનેલી આ ઇલેક્ટ્રિક એસયુવીને ભારત NCAP હેઠળ પહેલેથી જ 5-સ્ટાર સલામતી રેટિંગ મળી ચૂક્યું છે, જેમાં પુખ્ત વયના અને બાળ મુસાફરોના રક્ષણ માટે કારને ઉત્તમ સ્કોર મળ્યો હતો. ગ્રાહકોએ કાર ખરીદતી વખતે બંને ટેસ્ટના ધોરણો અને પરિણામોને અલગ-અલગ સંદર્ભમાં જોવા જોઈએ.