મણિપુરના નોની જિલ્લામાં સશસ્ત્ર જૂથો વચ્ચે થયેલા ગોળીબારમાં ત્રણ લોકોના મોત થયા છે. આ ઘટનાથી વિસ્તારમાં ભારે ચિંતા અને તણાવ ફેલાયો છે.
પોલીસ માહિતી મુજબ, નોની જિલ્લાના નુંગબા પોલીસ સ્ટેશન વિસ્તારમાં આવેલા કેકરુ નાગા ગામમાં અજ્ઞાત સશસ્ત્ર લોકો અને જૂથો વચ્ચે અચાનક ગોળીબાર શરૂ થયો હતો. આ અથડામણમાં ત્રણ લોકોનાં મોત નીપજ્યાં છે. પોલીસ અધિકારીએ જણાવ્યું કે મૃતકો પાસેથી હથિયારો અને ગોળાબારૂદ પણ મળી આવ્યાં છે. ઘટનાની વધુ તપાસ ચાલુ છે.
કુકી આદિવાસી સંગઠન 'કુકી ઇનપી મણિપુર' (KIM)એ આરોપ લગાવ્યો છે કે આ હત્યાઓમાં NSCN-IM અને ઝેલીયાંગ્રોંગ યુનાઇટેડ ફ્રન્ટના સશસ્ત્ર કેડરોનો હાથ છે. સંગઠને કહ્યું કે પૂરતી સુરક્ષા ન મળતાં ગ્રામજનોએ પોતાના રક્ષણ માટે આગળ આવવું પડ્યું છે.
આ ઘટના બાદ શનિવારે રાજધાની ઇમ્ફાલમાં હજારો લોકોએ વિશાળ રેલી કાઢીને રાજ્ય સરકારને 'છેલ્લી ચેતવણી' આપી છે. 'કોઓર્ડિનેટિંગ કમિટી ઓન મણિપુર ઇન્ટિગ્રિટી' (COCOMI) અને અનેક નાગરિક સમાજ સંગઠનોના નેતૃત્વમાં આ રેલી યોજાઈ હતી. તેમાં ખીણ અને પહાડી વિસ્તારોના લોકો તથા નાગા સંગઠનો પણ મોટી સંખ્યામાં જોડાયા હતા.
પ્રદર્શનકારીઓનું કહેવું છે કે વર્તમાન ભાજપ સરકાર રાજ્યમાં શાંતિ સ્થાપવામાં નિષ્ફળ રહી છે. તેથી સરકારે કાં તો કડક પગલાં લઈને સંપૂર્ણ શાંતિ બહાલ કરવી જોઈએ, અથવા તો સત્તા પરથી રાજીનામું આપવું જોઈએ.
રેલી બાદ છ સૂત્રીય પ્રસ્તાવ પસાર કરવામાં આવ્યો છે. તેમાં મુખ્ય માંગણીઓ આ પ્રમાણે છે: રાજ્યમાં તાત્કાલિક અને કાયમી શાંતિ સ્થાપવી; વિસ્થાપિત થયેલા હજારો લોકોની સુરક્ષિત ઘરવાપસી સુનિશ્ચિત કરવી; કુકી-ઝો ઉગ્રવાદી સંગઠનો સાથેના 'સસ્પેન્શન ઓફ ઓપરેશન્સ' (SoO) સમજૂતી રદ કરીને કડક ઓપરેશન શરૂ કરવું; અને NRCને 1951ને આધાર વર્ષ માનીને લાગુ કરવું.
પ્રદર્શનકારીઓએ ટિડિમ ગ્રાઉન્ડથી થાઉ મેદાન તરફ કૂચ કરવાનો પ્રયાસ કર્યો ત્યારે સુરક્ષાદળોએ કાસમપત જંક્શન અને અન્ય મહત્વના સ્થળોએ બેરિકેડ લગાવીને તેમને અટકાવ્યા હતા. રાજ્યમાં વધતા તણાવને પગલે સુરક્ષા વ્યવસ્થા કડક કરી દેવામાં આવી છે.
ઉલ્લેખનીય છે કે મણિપુરમાં મે 2023થી ચાલી રહેલી જાતિ આધારિત હિંસામાં અનેક લોકોના મોત થયા છે અને હજારો લોકો પોતાનાં ઘર છોડીને વિસ્થાપિત થયા છે. રાજ્યમાં શાંતિ પુનઃસ્થાપિત કરવી એ સૌથી મોટો પડકાર બની રહ્યો છે.