કાઉન્ટી ચેમ્પિયનશિપમાં બુધવારે વૉરવિકશાયરે એસેક્સને 8 વિકેટે હરાવ્યું. ભારતીય સ્પિનર માનવ સુથારે બીજી ઇનિંગમાં 5 વિકેટ ઝડપીને જીતમાં મહત્વની ભૂમિકા ભજવી. વૉરવિકશાયરે 133 રનનો લક્ષ્યાંક 26 ઓવરમાં 2 વિકેટ ગુમાવીને હાંસલ કરી લીધો. આ જીત સાથે ટીમ ડિવિઝન-1ની ટાઇટલ રેસમાં ટોચ પર પહોંચી ગઈ છે.
પ્રથમ ઇનિંગમાં એક પણ વિકેટ ન લેનારા સુથારે બીજી ઇનિંગમાં 24 ઓવર ફેંકી. તેમણે 75 રન આપીને 5 વિકેટ ઝડપી. એસેક્સની સમગ્ર ટીમ 189 રને ઓલઆઉટ થઈ ગઈ. આ સિઝનમાં સુથારની આ બીજી 5 વિકેટ હૉલ છે. પાંચ મેચમાં તેમના કુલ 26 વિકેટ થઈ ગયા છે. મેચમાં તેમણે કુલ 6 વિકેટ ઝડપી.
લક્ષ્યાંકનો પીછો કરતા જેન મલિકે 55 બોલમાં 51 રનની ઇનિંગ્સ રમી. તેમણે ચાર છગ્ગા ફટકાર્યા. ડેન મૉસ્લી અને સેમ હેને ટીમને જીત સુધી પહોંચાડી. વૉરવિકશાયરની આ પાંચ મેચમાં ચોથી જીત છે.
બીજી તરફ, ગ્લોસ્ટરશાયર માટે રમી રહેલા સાઈ કિશોરે મિડલસેક્સ સામેની પ્રથમ ઇનિંગ્સમાં 131 બોલમાં 71 રન બનાવ્યા. તેમની ઇનિંગ્સને કારણે ગ્લોસ્ટરશાયર પ્રથમ ઇનિંગ્સમાં મિડલસેક્સથી માત્ર 30 રન પાછળ રહ્યું. સાઈ કિશોરે બોલિંગમાં પણ 2 વિકેટ ઝડપી.
ડરહામ માટે રમી રહેલા મયંક અગ્રવાલે 220 બોલમાં 177 રન બનાવ્યા. તેમની ઇનિંગ્સને કારણે ટીમને પ્રથમ ઇનિંગ્સમાં મજબૂત સ્કોર બનાવવામાં મદદ મળી. મયંકે ડરહામ માટે પ્રથમ અને ફર્સ્ટ-ક્લાસ ક્રિકેટમાં 22મી સદી ફટકારી.
સસેક્સ માટે રમી રહેલા જયદેવ ઉનાડકટે પ્રથમ ઇનિંગમાં 83 રન આપીને 4 વિકેટ લીધી. બીજી તરફ, નોટિંઘમશાયરના મુકેશ કુમારને સસેક્સ સામેની પ્રથમ ઇનિંગ્સમાં એક પણ વિકેટ મળી નહીં. તેમણે 56 રન આપ્યા.
યોર્કશાયર માટે સમરસેટ સામે રમી રહેલા કુલદીપ યાદવે પ્રથમ ઇનિંગ્સમાં 7 ઓવરમાં 31 રન આપ્યા. તેઓ એક પણ વિકેટ લઈ શક્યા નહીં. તેમણે બેટિંગમાં 11 રન બનાવ્યા.
સરે માટે રમી રહેલા આકીબ નબીએ ગ્લેમોર્ગન સામે પ્રથમ ઇનિંગ્સમાં 36 રન આપીને 4 વિકેટ લીધી હતી. બીજી ઇનિંગ્સમાં તેઓ 63 રન આપ્યા છતાં એક પણ વિકેટ લઈ શક્યા નહીં. બીજા દિવસની રમત પૂરી થઈ ત્યાં સુધી ગ્લેમોર્ગને 5 વિકેટના નુકસાન પર 339 રન બનાવી લીધા હતા.