ઓક્ટોબર 2026 મહિન્દ્રા એન્ડ મહિન્દ્રા માટે રેકોર્ડનો મહિનો રહ્યો છે. કંપનીએ આ મહિને દેશ-વિદેશ મળીને કુલ 1,31,109 વાહનો વેચ્યા છે, જે તેના ઇતિહાસમાં એક મહિનામાં સૌથી વધુ વેચાણ છે. ગયા વર્ષના ઓક્ટોબરની સરખામણીમાં આ 9 ટકાનો વધારો છે.
સ્થાનિક બજારમાં કંપનીએ ઓક્ટોબરમાં 73,338 SUV વેચી છે. ગયા વર્ષે આ જ મહિને આ આંકડો 71,624 યુનિટ હતો, એટલે કે વર્ષ-દર-વર્ષ 2.39 ટકાનો વધારો થયો છે. તહેવારોની મોસમમાં ગ્રાહકોની વધેલી માંગ અને નવા મોડેલોને કારણે વેચાણને ટેકો મળ્યો છે.
નિકાસનો આંકડો ઉમેરતાં કુલ યુટિલિટી વાહનોનું વેચાણ 74,904 યુનિટ થયું છે. ચાલુ નાણાકીય વર્ષ 2026-27માં એપ્રિલથી ઓક્ટોબર સુધી કંપનીએ સ્થાનિક બજારમાં કુલ 4,31,480 SUV વેચી છે.
થ્રી-વ્હીલર સેગમેન્ટમાં પણ મોટો ઉછાળો નોંધાયો છે. ઇલેક્ટ્રિક મોડેલો સહિત કંપનીએ ઓક્ટોબરમાં 17,632 થ્રી-વ્હીલર વેચ્યા છે, જે ગયા વર્ષના 12,762 યુનિટ કરતાં 38 ટકા વધુ છે. આ સમયગાળામાં થ્રી-વ્હીલરની નિકાસ 77 ટકા વધીને 7,102 યુનિટ થઈ છે.
મહિન્દ્રા ટ્રક એન્ડ બસ ડિવિઝન અને SML મહિન્દ્રાએ સંયુક્ત રીતે નિકાસ સહિત 2,838 કોમર્શિયલ વાહનો વેચ્યા છે. ગયા વર્ષે આ જ મહિને આ આંકડો 2,034 યુનિટ હતો, એટલે કે 40 ટકાનો વધારો થયો છે.