એલપીજી ગેસના ગ્રાહકો માટે એક મહત્વપૂર્ણ સૂચના છે. 1 ઓક્ટોબર 2026થી, સબસિડીવાળા ભાવે રસોઈ ગેસ સિલિન્ડર મેળવવા માટે બાયોમેટ્રિક આધાર ઓથેન્ટિકેશન (BAA) એટલે કે આંગળીના છાપ અથવા ચહેરાની ઓળખ દ્વારા વેરિફિકેશન કરાવવું ફરજિયાત બનશે. પેટ્રોલિયમ અને કુદરતી ગેસ મંત્રાલયે આ નિર્ણય લીધો છે.
આ નિયમનો મુખ્ય હેતુ ગેસ સબસિડી વિતરણ પ્રણાલીમાં પારદર્શિતા લાવવાનો અને નકલી તથા ડુપ્લિકેટ કનેક્શનો પર નિયંત્રણ લાવવાનો છે. સરકાર ઈચ્છે છે કે સબસિડીનો લાભ ફક્ત પાત્ર લાભાર્થીઓને જ મળે. જો કોઈ ગ્રાહક નિર્ધારિત સમયમર્યાદામાં આ પ્રક્રિયા પૂરી નહીં કરે, તો તેમને સબસિડીવાળા ભાવે સિલિન્ડર મળવાનું બંધ થઈ જશે.
શું બદલાયું છે?
1 ઓક્ટોબર 2026થી દેશભરમાં ઘરગથ્થુ એલપીજી સિલિન્ડરના બુકિંગ અને સબસિડી માટે નવા નિયમો લાગુ થશે. સબસિડી મેળવવા માટે બાયોમેટ્રિક ઓથેન્ટિકેશન પૂર્ણ કરવું જરૂરી છે. આ ઉપરાંત, સરકારે રિફિલ બુક કરવાના સમયગાળામાં પણ ફેરફાર કર્યો છે. હવે શહેરી અને ગ્રામીણ બંને પ્રકારના ગ્રાહકો અગાઉના બુકિંગના 25 દિવસ પછી જ પોતાનો આગામી સિલિન્ડર બુક કરી શકશે.
કોને છૂટ મળી છે?
જે ગ્રાહકોએ અગાઉ ચાલેલા e-KYC અભિયાન દરમિયાન પોતાનું વેરિફિકેશન પૂરું કરી લીધું છે, તેમણે કંઈ કરવાની જરૂર નથી. લગભગ 89.9% સક્રિય ઘરગથ્થુ ગ્રાહકો (અંદાજે 27.43 કરોડ લોકો) આ કેટેગરીમાં આવે છે. તેમનું બુકિંગ અને સબસિડી પહેલાની જેમ ચાલુ રહેશે.
જો કે, ઘરેલું ગ્રાહકોની કોઈ પણ શ્રેણીને આ નિયમમાંથી કાયમી છૂટ આપવામાં આવી નથી. વૃદ્ધો, બીમાર કે અસમર્થ ગ્રાહકોને પણ આ પ્રક્રિયા કરાવવી પડશે.
જો વેરિફિકેશન ન કરાવો તો શું થશે?
તમારા સિલિન્ડરનો સપ્લાય બંધ નહીં થાય. પરંતુ, તમને સબસિડીવાળી નક્કી કરેલી કિંમતે સિલિન્ડર નહીં મળે. તમારે વર્તમાન કોમર્શિયલ અથવા માર્કેટ કિંમત જાતે ચૂકવવી પડશે.
ઓઈલ માર્કેટિંગ કંપનીઓને સૂચના આપવામાં આવી છે કે જે કનેક્શન નિયમોનું પાલન નથી કરતા, તેમના પર કેટલાક નિયંત્રણો લાદવામાં આવી શકે છે. જેમ કે, તેમને સ્ટાન્ડર્ડ 14.2 કિલો વાળા સિલિન્ડરને બદલે માત્ર નાના 5 કિલો અથવા 10 કિલો વાળા સિલિન્ડર જ બુક કરવાની મંજૂરી આપવામાં આવી શકે છે.
ઓથેન્ટિકેશન કેવી રીતે પૂર્ણ કરવું?
આ પ્રક્રિયા તમે ત્રણ રીતે પૂરી કરી શકો છો:
1. ગેસ ડિલિવરી કરનાર વ્યક્તિના ડિવાઈસ પર.
2. તમારી સ્થાનિક ગેસ એજન્સી પર જઈને.
3. તમારા સ્માર્ટફોન પર Aadhaar FaceRD એપ અને તમારા ગેસ પ્રોવાઈડરની એપ ડાઉનલોડ કરીને.
આ નિયમ દેશભરમાં લાગુ થશે, તેથી તમામ ગ્રાહકોએ સમયસર વેરિફિકેશન કરાવી લેવું જોઈએ જેથી ભવિષ્યમાં કોઈ અસુવિધા ન થાય.