દર મહિનાની પહેલી તારીખે સામાન્ય માણસના ખિસ્સા અને રોજિંદા જીવન પર અસર કરતા ઘણા ફેરફારો લાગુ થાય છે. જો તમે રસોઈ માટે એલપીજી સિલિન્ડર વાપરો છો, તો 1 ઓક્ટોબરથી લાગુ થતા પાંચ નવા નિયમો તમારે જાણવા જરૂરી છે. સિલિન્ડરના બુકિંગ, સબસિડી અને ડિલિવરીને લગતા આ નિયમોમાં ફેરફાર કરવામાં આવ્યા છે. તમારા ગેસ સપ્લાયમાં કોઈ તકલીફ ન પડે તે માટે આ માહિતી પહેલેથી જાણી લેવી સારી.
1. સબસિડીવાળા સિલિન્ડર માટે આધાર પ્રમાણીકરણ ફરજિયાત
1 ઓક્ટોબરથી સબસિડીવાળા ઘરેલુ એલપીજી સિલિન્ડર લેતા ગ્રાહકો માટે બાયોમેટ્રિક આધાર પ્રમાણીકરણ ફરજિયાત બન્યું છે. જે ગ્રાહકોએ આ પ્રક્રિયા હજુ પૂરી કરી નથી, તેમણે આગળનું રિફિલ બુક કરાવતા પહેલાં તે પૂરી કરવી પડશે. આ પ્રમાણીકરણ સિલિન્ડરની ડિલિવરી વખતે એજન્ટ પાસે, સંબંધિત ઓઈલ કંપનીની મોબાઈલ એપ્લિકેશનથી અથવા ગેસ એજન્સી પર જઈને કરાવી શકાય છે. જેમણે આ પ્રક્રિયા પહેલેથી પૂરી કરી લીધી છે, તેમને ફરી કરવાની જરૂર નથી.
2. મહિનાની પહેલી તારીખે ભાવમાં ફેરફાર શક્ય
દર મહિનાની શરૂઆતમાં ઓઈલ કંપનીઓ એલપીજીના ભાવની સમીક્ષા કરે છે અને નવા દર નક્કી કરે છે. આ દર આંતરરાષ્ટ્રીય ઈંધણના ભાવ, ગેસ આયાતના ખર્ચ અને સરકારી ટેક્સ જેવા પરિબળો પર આધાર રાખે છે. હાલમાં દિલ્હીમાં કોમર્શિયલ સિલિન્ડર 2,747 રૂપિયામાં અને ઘરેલુ સિલિન્ડર 942 રૂપિયામાં મળી રહ્યું છે.
3. રિફિલ બુકિંગની મર્યાદા 45 દિવસથી ઘટીને 25 દિવસ
સરકારે ઘરેલુ એલપીજી સિલિન્ડરના આગલા રિફિલ માટે બુકિંગનો સમય 45 દિવસથી ઘટાડીને 25 દિવસ કર્યો છે. ફેબ્રુઆરી 2026માં મધ્ય પૂર્વના દેશોમાં ચાલી રહેલા તણાવને કારણે ગેસની માંગ અને પુરવઠો સંતુલિત રાખવા અલગ અલગ બુકિંગ મર્યાદા નક્કી કરવામાં આવી હતી. હવે સરકારે દેશભરના તમામ ઘરેલુ ગ્રાહકો માટે 25 દિવસનો એકસરખો નિયમ લાગુ કરવાનો નિર્ણય લીધો છે.
4. પીએનજી કનેક્શન હોય ત્યાં કડક કાર્યવાહી
તમારી સોસાયટી કે ઘરમાં પાઈપ્ડ નેચરલ ગેસ (પીએનજી)ની સુવિધા હોવા છતાં તમે એલપીજી સિલિન્ડર વાપરતા હોવ, તો આ નિયમ તમને લાગુ પડે છે. નોટિસ મળ્યાના 90 દિવસમાં પીએનજી કનેક્શન ન લીધું તો એલપીજી સપ્લાય બંધ કરી શકાય છે. પેટ્રોલિયમ મંત્રાલય પીએનજીના વપરાશને વધારવા માટે કડક વલણ અપનાવી રહ્યું છે. ઓઈલ કંપનીઓએ અત્યાર સુધીમાં આવા 363 ગ્રાહકોને નોટિસ આપી છે.
5. સિલિન્ડરની ડિલિવરી માટે ઓટીપી ફરજિયાત
હવેથી ગેસ સિલિન્ડરની ડિલિવરી વધુ સુરક્ષિત બનાવવામાં આવી છે. માત્ર બુકિંગની રસીદ બતાવવી હવે પૂરતી નથી. ગેસ બુક કરશો ત્યારે તમારા નોંધાયેલા મોબાઈલ નંબર પર એક ઓટીપી મોકલવામાં આવશે. ડિલિવરી એજન્ટ ઘરે સિલિન્ડર આપવા આવે ત્યારે આ ઓટીપી તેની સાથે શેર કરવો ફરજિયાત છે. આ નવી સિસ્ટમનો હેતુ છેતરપિંડી રોકવાનો અને નોંધણી વગરના ગ્રાહકોને થતી ડિલિવરી અટકાવવાનો છે.