ભારતમાં સાદા ટેબલ સોલ્ટની જગ્યાએ ઓછા સોડિયમવાળા નમકનો ઉપયોગ કરવાથી દર વર્ષે અંદાજિત 4 લાખ મૃત્યુ અટકાવી શકાય અને હાર્ટ તથા કિડની સંબંધિત 15 લાખથી વધુ નવા કેસ ઘટાડી શકાય એમ એક નવા સંશોધનમાં જણાવવામાં આવ્યું છે. આ અભ્યાસ ‘નેચર હેલ્થ’ જર્નલમાં પ્રકાશિત થયો છે.
જ્યોર્જ ઇન્સ્ટિટ્યૂટ ફોર ગ્લોબલ હેલ્થ દ્વારા કરાયેલા આ સંશોધનમાં 193 દેશોના ડેટાનું વિશ્લેષણ કરવામાં આવ્યું છે. તેમાં અનુમાન લગાવવામાં આવ્યું છે કે જો વિશ્વભરના લોકો ઓછા સોડિયમવાળું નમક અપનાવે તો દર વર્ષે લગભગ 30 લાખ મોત અને હાર્ટ તથા કિડનીની ક્રોનિક બીમારીઓના 1.01 કરોડ નવા કેસ ટાળી શકાય છે.
સંશોધનમાં જણાવાયું છે કે આહારમાં નાનકડો ફેરફાર પણ સ્વાસ્થ્ય પર મોટી અસર કરી શકે છે. ઓછા સોડિયમવાળા નમકમાં સોડિયમનું પ્રમાણ ઓછું અને પોટેશિયમનું પ્રમાણ વધુ હોય છે, જે બ્લડ પ્રેશર નિયંત્રણમાં મદદ કરે છે.
જ્યોર્જ ઇન્સ્ટિટ્યૂટના સિનિયર પ્રોફેસર ફેલ બ્રૂસ નીલે જણાવ્યું કે વધુ પડતું સોડિયમ લેવું અને પૂરતું પોટેશિયમ ન લેવું એ હાઈ બ્લડ પ્રેશરનું મુખ્ય કારણ છે. તેમણે કહ્યું કે નમકમાં ફેરફાર કરવાથી હાઈપરટેન્શન, સ્ટ્રોક, હાર્ટ એટેક અને કિડનીની બીમારીઓને નિયંત્રિત કરવામાં મદદ મળી શકે છે અને તેનાથી થતા મૃત્યુ પણ ઘટાડી શકાય છે.
ભારતમાં મીઠાનો સરેરાશ દૈનિક વપરાશ 9.01 ગ્રામ અંદાજવામાં આવે છે, જે વિશ્વ સ્વાસ્થ્ય સંગઠન (WHO) દ્વારા સૂચવાયેલા 5 ગ્રામની મર્યાદાથી લગભગ બમણો છે. આ વધુ વપરાશ હાઈ બ્લડ પ્રેશરનું એક કારણ છે. ઇન્ડિયન કાઉન્સિલ ઓફ મેડિકલ રિસર્ચના 2023ના અભ્યાસ મુજબ ભારતમાં 31.5 કરોડ લોકો, એટલે કે કુલ વસ્તીના 35.5 ટકા લોકો હાઈપરટેન્શનથી પીડિત છે.
WHOએ 2025માં નાગરિકોને સલાહ આપી છે કે તેઓ સાદા મીઠાના સ્થાને પોટેશિયમ ક્લોરાઇડ ધરાવતા, ઓછા સોડિયમવાળા વિકલ્પનો ઉપયોગ કરે. આ સાવચેતી રાખવાથી હૃદય અને કિડનીના સ્વાસ્થ્યને લાંબા ગાળે લાભ થઈ શકે છે.