દેશની સૌથી મોટી વીમા કંપની LIC (લાઈફ ઈન્સ્યોરન્સ કોર્પોરેશન ઓફ ઈન્ડિયા) હવે ખાનગી ક્ષેત્રની અગ્રણી બેંક ICICI બેંકમાં પોતાની ભાગીદારી વધારવા જઈ રહી છે. ભારતીય રિઝર્વ બેંક (RBI) એ LIC ને ICICI બેંકની પેઇડ-અપ શેર મૂડી અથવા વોટિંગ અધિકારોમાં 9.99 ટકા સુધીનો હિસ્સો ખરીદવાની મંજૂરી આપી છે.
ICICI બેંકે શેરબજારને આપેલી રેગ્યુલેટરી ફાઈલિંગમાં આ માહિતી આપી છે. 4 સપ્ટેમ્બર 2026ની રાત્રે બેંકને RBIનો મંજૂરી પત્ર મળ્યો હતો. RBIની શરતો મુજબ, LIC ને આ હિસ્સેદારી વધારવા માટે એક વર્ષનો સમય આપવામાં આવ્યો છે. જો LIC નિર્ધારિત સમયમાં આ પ્રક્રિયા પૂર્ણ નહીં કરે, તો આ મંજૂરી આપોઆપ રદ ગણાશે. આ ઉપરાંત, તમામ વૈધાનિક ધારાધોરણોનું પાલન કરવાની શરત પર જ આ મંજૂરી અપાઈ છે.
આ નિર્ણય LIC ના તાજેતરના સફળ રોકાણો બાદ લેવામાં આવ્યો છે. થોડા સમય પહેલા LIC એ ભારતની ટોચની ત્રણ IT કંપનીઓ – ટાટા કન્સલ્ટન્સી સર્વિસીસ (TCS), ઈન્ફોસિસ અને HCL ટેક્નોલોજીસમાં રોકાણ વધાર્યું હતું. ક્ષેત્રમાં AIના કારણે નોકરીઓ પર જોખમની ચિંતા ચાલી રહી હતી, ત્યારે LIC એ આ વિપરીત વલણ અપનાવ્યું. આ રોકાણના કારણે LIC ને માત્ર 35 દિવસમાં ₹21,000 કરોડથી વધુનો નફો થયો.
અહેવાલો અનુસાર, જૂન 2026ના અંતે આ ત્રણ કંપનીઓમાં LIC ના રોકાણની કુલ માર્કેટ વેલ્યૂ ₹1.05 લાખ કરોડ હતી. ઓગસ્ટની શરૂઆત સુધીમાં આ શેરોમાં આવેલા ઉછાળાને કારણે આ આંકડો વધીને ₹1.26 લાખ કરોડ થઈ ગયો. એટલે કે, ગણતરીના દિવસોમાં LIC ને કાગળ પર ₹21,032 કરોડનો નફો થયો. આ સફળતા બાદ હવે LIC બેન્કિંગ ક્ષેત્રે પણ પોતાનું રોકાણ મજબૂત કરી રહી છે.
નોંધ: આ માહિતી ફક્ત સામાન્ય જાણકારી માટે છે. રોકાણ કરતા પહેલા નિષ્ણાતની સલાહ લેવી ઉચિત છે.