આજકાલની જીવનશૈલી અને ખાનપાનના કારણે બીમારીઓ ઝડપથી વધી રહી છે. જો કોઈ વ્યક્તિની તબિયત બગડે અને સારવાર માટે તેને હોસ્પિટલમાં દાખલ થવું પડે, તો સારવારનો ખર્ચ પરિવાર પર ભારે બોજ બની જાય છે. આવી સ્થિતિમાં જો હોસ્પિટલમાં સારવાર દરમિયાન દરરોજ ચોક્કસ રકમ મળતી રહે, તો પરિવારને આર્થિક રીતે મોટી રાહત મળી શકે છે. આ જ વિચારને ધ્યાનમાં રાખીને એલઆઈસી (LIC)એ નવો હેલ્થ શીલ્ડ પ્લાન 907 લોન્ચ કર્યો છે.
આ પોલિસીની સૌથી મોટી ખાસિયત એ છે કે નિયત શરતો પૂરી થાય તો દર્દીને હોસ્પિટલમાં દાખલ રહેવા દરમિયાન દરરોજ નક્કી કરેલી રકમ મળે છે. આ રકમ 2,500 રૂપિયાથી લઈને 10,000 રૂપિયા સુધીની હોઈ શકે છે. આનાથી પરિવારને સારવારના ખર્ચમાં નોંધપાત્ર મદદ મળે છે.
આ પ્લાનમાં અન્ય ફાયદા પણ છે. જેમ કે, સતત ત્રણ વર્ષ સુધી ક્લેમ ન કરો તો દૈનિક લાભની રકમમાં વધારો થાય છે. મોટી સર્જરી માટે એકસાથે રકમ મળે છે, હેલ્થ ચેકઅપનો લાભ મળે છે અને અમુક બીમારીઓ માટે નાણાકીય સહાય પણ મળે છે.
પોલિસી લેતા પહેલા તેના ફાયદા, નિયમો, શરતો અને પ્રીમિયમ સંબંધિત માહિતી જરૂરથી વાંચી લેવી જોઈએ. ત્યારબાદ જ નિર્ણય લેવો યોગ્ય રહેશે.