ભારતીય જીવન વીમા નિગમ (LIC) મહિલાઓને આર્થિક રીતે સક્ષમ બનાવવા માટે 'બીમા સખી' યોજના ચલાવી રહ્યું છે. આ યોજના હેઠળ મહિલાઓ વીમા એજન્ટ તરીકે જોડાઈ શકે છે અને પોલિસી વેચાણ પર મળતા કમિશન ઉપરાંત શરૂઆતના ત્રણ વર્ષ દરમિયાન નિશ્ચિત માસિક સ્ટાઈપેન્ડ પણ મેળવી શકે છે.
આ યોજના ખાસ કરીને ગ્રામીણ વિસ્તારોની મહિલાઓ માટે ધ્યાનમાં રાખીને બનાવવામાં આવી છે, જેથી તેમને પોતાના વિસ્તારમાં જ રહીને આજીવિકા મેળવવાની તક મળે. સાથે જ ગ્રામીણ વિસ્તારોમાં વીમા અંગે જાગૃતિ વધે તેવો ઉદ્દેશ્ય પણ છે.
કોણ અરજી કરી શકે?
આ યોજનામાં જોડાવા માટે અરજદાર મહિલાની વય 18થી 70 વર્ષ વચ્ચે હોવી જરૂરી છે. શૈક્ષણિક લાયકાતમાં 10મું ધોરણ પાસ હોવું પૂરતું છે.
સ્ટાઈપેન્ડ કેટલું મળશે?
યોજના હેઠળ ત્રણ વર્ષ સુધી નિશ્ચિત માસિક સ્ટાઈપેન્ડ ચૂકવવામાં આવે છે. પ્રથમ વર્ષે દર મહિને ₹7,000, બીજા વર્ષે ₹6,000 અને ત્રીજા વર્ષે ₹5,000 મળે છે. આ ઉપરાંત પોલિસી વેચાણ પર મળતું કમિશન અલગથી મળશે. આ સમયગાળા દરમિયાન LIC તરફથી મહિલાઓને વ્યાવસાયિક તાલીમ પણ આપવામાં આવે છે. વેચાણનો ટાર્ગેટ પૂરો કરનાર મહિલાઓને વધારાનું કમિશન પણ મળે છે. ત્રણ વર્ષનો કાર્યકાળ પૂરો કર્યા બાદ તેઓ કાયમી LIC એજન્ટ તરીકે કામ કરી શકે છે.
મુખ્ય શરતો શું છે?
હાલમાં LICમાં કાર્યરત એજન્ટો અને કર્મચારીઓના સંબંધીઓ આ યોજના માટે અયોગ્ય ગણાશે. એજન્ટ તરીકે કામ કરતી વખતે પ્રથમ વર્ષમાં કરવામાં આવેલી પોલિસીઓમાંથી ઓછામાં ઓછી 65% પોલિસી ચાલુ રહેવી ફરજિયાત છે.
અરજી કેવી રીતે કરવી?
ઇચ્છુક મહિલાઓ LICની સત્તાવાર વેબસાઇટ પર જઈને ઓનલાઇન અરજી સબમિટ કરી શકે છે. અરજી સાથે ઉંમરનો પુરાવો, રહેઠાણનો પુરાવો અને 10મા ધોરણની માર્કશીટ જેવા જરૂરી દસ્તાવેજો અપલોડ કરવાના રહેશે.