ગેંગસ્ટર લોરેન્સ ગેંગે કેનેડા સરકારને તેમના દેશ પર રાજ કરવાની ધમકી આપી છે. આ માટે ભારતમાંથી પત્ર મોકલવામાં આવ્યો હોવાનો દાવો કરવામાં આવ્યો છે. પત્ર વર્ષ 2025માં કેનેડા સરકારને મોકલવામાં આવ્યો હતો. હવે કેનેડાના મીડિયા હાઉસ CBC ન્યૂઝે આ પત્ર મેળવીને સમગ્ર મામલાનો ખુલાસો કર્યો છે. લોરેન્સ અમદાવાદની સાબરમતી જેલમાં છે.
પત્રના હવાલાથી દાવો કરવામાં આવ્યો છે કે લોરેન્સે કેનેડા સરકારને સેના અને પોલીસના નામે ધમકી આપી હતી. ઇમિગ્રેશન એન્ડ રેફ્યુજી બોર્ડની કાર્યવાહી સંબંધિત રેકોર્ડમાંથી પણ આ વાતનો ખુલાસો થયો છે. પત્ર અંગે તપાસ ચાલુ છે. કેનેડાની એડમન્ટન પોલીસ સર્વિસની ઓર્ગેનાઇઝ્ડ ક્રાઇમ બ્રાન્ચે તેને રેકોર્ડનો ભાગ બનાવ્યો છે અને તેને એબોટ્સફોર્ડ પોલીસને મોકલ્યો છે.
પત્રમાં લખ્યું છે- અમે ભારતીય ગેંગ છીએ. કેનેડામાં અમને રોકવાની કોઈની હિંમત નથી. હવે અમે કેનેડા પર રાજ કરીશું. કેનેડામાં અમારા 5 હજારથી વધુ સભ્યો છે. તેઓ માત્ર 1000 ડોલર માટે ગોળીબાર કરી શકે છે. આ તમારા સૌ માટે ચેતવણી છે. અમારી પ્રવૃત્તિઓથી દૂર રહો, નહીં તો બીજા દિવસે તમે પોલીસ સ્ટેશનમાં ગોળીબાર થયાના સમાચાર જોવા મળશે.
પત્રમાં સીધા કેનેડાના રક્ષા મંત્રી, સેના અને પોલીસને પડકારવામાં આવ્યા છે. પત્રની શરૂઆતમાં લખ્યું છે- સમગ્ર કેનેડાને જય શ્રી રામ. ગોલ્ડી ગેંગ તરફથી ચેતવણી. કેનેડામાં અમારા તમામ ભાઈઓને લોરેન્સ ગેંગ, ગોલ્ડી બરાડ તરફથી જય શ્રી રામ.
પત્રમાં લખ્યું છે- અમે કેનેડા પર રાજ કરીશું, અમને કોઈ રોકી શકશે નહીં. અમે ખૂબ શક્તિશાળી છીએ. તમારા હેલ એન્જલ્સ પણ અમારી સામે કંઈ નથી. કાયદા અમલીકરણ એજન્સીઓને ચેતવણી આપતાં લખ્યું છે- અમારી પ્રવૃત્તિઓથી દૂર રહો, નહીં તો બીજા દિવસે તમને કોઈ પોલીસ સ્ટેશન પર ફાયરિંગના સમાચાર સાંભળવા મળશે. અમારી પાસે કેનેડા પોલીસ કરતાં પણ વધુ હથિયારો છે.
પત્રમાં જાતિવાદી ટિપ્પણી કરતાં કહેવામાં આવ્યું છે કે વ્હાઇટ પિગ્સ સમુદાયે શક્ય તેટલી વહેલી તકે દેશ છોડી દેવો જોઈએ. આ કોઈ મજાક નથી, પરંતુ લોરેન્સનો સીધો આદેશ છે. ગેંગે કેનેડાના વેપારી જગતને સીધું નિશાન બનાવતાં કહ્યું છે કે હવેથી દરેક ઉદ્યોગપતિએ તેમને પ્રોટેક્શન મની (ખંડણી) આપવી પડશે. આ ટેક્સ જેવું છે અને કોઈપણ બિઝનેસમેન પાસે તેનાથી બચવાનો કોઈ રસ્તો નથી. તેનાથી કોઈ ફરક પડતો નથી કે વેપારી ભારતીય છે, ગોરો છે કે કાળો. દરેકે ચૂકવણી કરવી જ પડશે.
લોરેન્સ 2015થી ભારતની જેલમાં બંધ છે, પરંતુ કેનેડિયન અધિકારીઓનું કહેવું છે કે તેના સિન્ડિકેટે વિદેશોમાં એક ખતરનાક આંતરરાષ્ટ્રીય નેટવર્ક ઊભું કરી લીધું છે. એબોટ્સફોર્ડ પોલીસે પુષ્ટિ કરી છે કે તેમને લોરેન્સ ગેંગ સાથે જોડાયેલો આ પત્ર મળ્યો હતો, જેની માહિતી દેશમાં ચાલી રહેલા ખંડણીના સંકટની તપાસ કરી રહેલી અન્ય કેનેડિયન કાયદા અમલીકરણ એજન્સીઓ સાથે શેર કરવામાં આવી છે.
કેનેડાના અનેક રાજ્યોમાં તાજેતરના દિવસોમાં થયેલી ગોળીબારની ઘટનાઓ અને ખંડણીના કેસોને કેનેડિયન તપાસ એજન્સીઓએ લોરેન્સ ગેંગના નેટવર્ક સાથે જોડીને જોયા છે. હવે આ પત્ર સામે આવ્યા બાદ કેનેડાના સુરક્ષા વર્તુળોમાં હલચલ મચી ગઈ છે.
2025થી અત્યાર સુધી કેનેડામાં લોરેન્સ અને ગોલ્ડી ગેંગે આ ગુનાહિત ઘટનાઓની જવાબદારી લીધી છે. ઓક્ટોબર 2025માં સરે શહેરમાં એક ભારતીય રેસ્ટોરન્ટ માલિકના 3-4 સ્થળો પર ધડાધડ ફાયરિંગ કરવામાં આવ્યું. સોશિયલ મીડિયા પર લોરેન્સ ગેંગના સાગરીત ગોલ્ડી ઢિલ્લોને પોસ્ટ શેર કરીને આ હુમલાની જવાબદારી લીધી હતી.
સરે સ્થિત કોમેડિયન કપિલ શર્માના કેપ્સ કેફે પર જુલાઈથી ઓક્ટોબર 2025 દરમિયાન ત્રણ વખત ફાયરિંગ કરવામાં આવ્યું, જેની જવાબદારી આ સિન્ડિકેટ સાથે જોડાયેલા શૂટરોએ લીધી હતી.
નવેમ્બર 2025માં કેનેડા-અલ્બર્ટામાં સાગરીતોની પરસ્પર હત્યા: ગોલ્ડી બરાડ અને રોહિત ગોદારાએ સંયુક્ત રીતે દુબઈમાં લોરેન્સના નજીકના સાથી જોરા સિદ્ધુની છરીના ઘા મારીને હત્યા કરવાની જવાબદારી લીધી. પોલીસ ફાઇલો અનુસાર, જોરા સિદ્ધુ કેનેડામાં ગેંગ માટે વોટ્સએપ દ્વારા ખંડણી વસૂલાતનું નેટવર્ક ચલાવતો હતો.
એડમોન્ટન, કેલગરી અને ઓન્ટેરિયોમાં રહેતા સાઉથ એશિયન કમ્યુનિટીના ઘરો અને સંપત્તિઓ પર ગોળીબારની ઘટનાઓ પણ સામે આવી છે.