મુંબઈના પ્રસિદ્ધ લાલબાગચા રાજા પંડાલમાં ગણેશ ઉત્સવ દરમિયાન બોલિવૂડ અને ટેલિવિઝન જગતની અનેક હસ્તીઓ દર્શન કરવા પહોંચી રહી છે. આ વર્ષે ૧૪ સપ્ટેમ્બરે ગણપતિની સ્થાપના થઈ છે અને ૨૫ સપ્ટેમ્બરે વિસર્જન થશે.
બુધવારે અનંત અંબાણીએ લાલબાગચા રાજાનાં દર્શન કરીને આશીર્વાદ લીધા. તેમના પહેલાં મંગળવારે અભિનેતા આયુષ્યમાન ખુરાના, ટીવી અભિનેત્રી રૂપાલી ગાંગુલી અને અંકિતા લોખંડે પણ બાપ્પાનાં દર્શન કર્યાં હતાં. આયુષ્યમાને દર્શન બાદ કપાળ પર તિલક લગાવ્યું હતું, જ્યારે અંકિતાએ ચરણોમાં નમન કરીને આશીર્વાદ લીધા હતા.
અગાઉ ગોવિંદાના પુત્ર યશવર્ધન અને પુત્રી ટીનાએ પણ ગણપતિ બાપ્પાનાં દર્શન કર્યાં હતાં. મંગળવારે ગોવિંદા પોતે ચર્ચિત ગર્લફ્રેન્ડ કોમલ રાની સ્વર્ણકાર સાથે લાલબાગચા રાજા પહોંચ્યા હતા. બંનેએ પંડાલમાં પ્રસાદ ચઢાવ્યો અને પૂજા-અર્ચનામાં ભાગ લીધો. તેમના પહેલાં સુનીતા આહુજા પોતાની સુરક્ષા ટીમ સાથે દર્શન કરવા આવી હતી.
સંજય દત્ત પત્ની માન્યતા દત્ત સાથે લાલબાગચા રાજાનાં દર્શન કરવા પહોંચ્યા હતા. બંનેએ સાથે મળીને ગણપતિની પૂજા કરી. સંજયે બાપ્પા સમક્ષ માથું નમાવ્યું અને કપાળ પર તિલક લગાવ્યું. ત્યાર બાદ તેમણે પત્ની માન્યતાના કપાળ પર પણ તિલક લગાવ્યું. આ દરમિયાન સંજય દત્તની મુલાકાત અભિનેતા ચંકી પાંડે સાથે થઈ, જે તેમની પુત્રી અનન્યા પાંડે સાથે ત્યાં પહોંચ્યા હતા. બંને કલાકારોએ એકબીજાની મુલાકાત કરી અને થોડો સમય વાતચીત કરી. સંજય દત્ત અનન્યા પાંડેને ભેટી પડ્યા હતા. સંજય કેસરી રંગના કુર્તામાં અને માન્યતા પિંક સૂટમાં જોવા મળ્યાં હતાં. ભારે ભીડ વચ્ચે સંજય માન્યતાનું ખાસ ધ્યાન રાખતો જોવા મળ્યો હતો.
ફિલ્મ ‘ચંદૂ ચેમ્પિયન’ માટે બેસ્ટ એક્ટરનો નેશનલ એવોર્ડ મળ્યા બાદ મંગળવારે સવારે કાર્તિક આર્યન લાલબાગચા રાજાનાં દર્શન કરવા પહોંચ્યો હતો. તેણે બાપ્પાના ચરણોમાં એવોર્ડ મૂકીને આશીર્વાદ લીધા હતા.
બોલિવૂડ અભિનેતા રાજપાલ યાદવ પણ મંગળવારે દર્શન કરવા પહોંચ્યો હતો. ખાસ વાત એ રહી કે તેણે વીઆઈપી એન્ટ્રી લેવાને બદલે સામાન્ય શ્રદ્ધાળુઓની કતારમાં ઊભા રહીને પોતાના વારાની રાહ જોઈ. રાજપાલે ભક્તોની સાથે ઊભા રહીને ‘ગણપતિ બાપ્પા મોરિયા’નો જાપ કર્યો અને ચરણસ્પર્શ કરીને દર્શન કર્યા. ચાહકોએ તેને પોતાની વચ્ચે જોઈને ખુશી વ્યક્ત કરી, અને એક્ટરે પણ સ્મિત સાથે લોકોનું અભિવાદન કર્યું.