ઓસ્ટ્રેલિયાના બેટ્સમેન માર્નસ લાબુશેનના નામે દક્ષિણ આફ્રિકા સામેની પ્રથમ ટેસ્ટમાં એક દુર્લભ સંયોગ નોંધાયો છે. ડર્બનના કિંગ્સમીડ મેદાન પર તેણે બંને ઇનિંગમાં સમાન 58 બોલનો સામનો કરીને સમાન 37 રન બનાવ્યા હતા. ટેસ્ટ ક્રિકેટના 149 વર્ષના ઇતિહાસમાં આવો સંયોગ બીજી વાર જોવા મળ્યો છે.
પ્રથમ ઇનિંગમાં લાબુશેને 58 બોલમાં 37 રન બનાવ્યા હતા. તેણે છ ચોગ્ગા ફટકાર્યા હતા. દક્ષિણ આફ્રિકાના બોલર વિઆન મુલ્ડરે તેને LBW આઉટ કર્યો હતો. બીજી ઇનિંગમાં પણ તેની બેટિંગ એ જ આંકડા સાથે અંત આવ્યો. તેણે ફરી 58 બોલમાં 37 રન બનાવ્યા અને ઇતિહાસમાં આવો સંયોગ સર્જાયો.
આ પહેલા ટેસ્ટ ક્રિકેટમાં આવો કિસ્સો ફક્ત એક જ વાર બન્યો હતો. ભારતના ભૂતપૂર્વ વિકેટકીપર સૈયદ કિરમાનીએ 1977-78માં ઓસ્ટ્રેલિયા સામે મેલબર્ન ટેસ્ટની બંને ઇનિંગમાં 62 બોલમાં 29-29 રન બનાવ્યા હતા. તે મેચમાં ભારતે પ્રથમ ઇનિંગમાં 256 રન બનાવ્યા હતા, જેમાં કિરમાનીનું યોગદાન 29 રનનું હતું. બીજી ઇનિંગમાં પણ તેણે એટલા જ રન બનાવ્યા હતા. ભારતે આ ટેસ્ટ 222 રનથી જીતી હતી.
લાબુશેન માટે આ સંયોગ નોંધપાત્ર હોવા છતાં, તેની બેટિંગમાં મોટી ઇનિંગ્સનો અભાવ ચિંતાનો વિષય છે. સારી શરૂઆત મળ્યા પછી પણ તે બંને ઇનિંગ્સમાં મોટો સ્કોર કરી શક્યો નહીં. ટેસ્ટ ક્રિકેટમાં સદી ફટકારવા માટે તે લાંબા સમયથી રાહ જોઈ રહ્યો છે. તેની છેલ્લી ટેસ્ટ સદી 2023માં આવી હતી. ત્યારથી મોટી ઇનિંગ ન રમી શકવાને કારણે તેના ફોર્મ અંગે ચર્ચા થઈ રહી છે.
આમ, લાબુશેનના 37 રન માત્ર એક સામાન્ય સ્કોર નથી, પરંતુ કિરમાની સાથેના સમાન સંયોગને કારણે આ આંકડો ક્રિકેટ ઇતિહાસમાં યાદગાર બન્યો છે.