જમ્મુ-કાશ્મીરના કિશ્તવાડ જિલ્લામાં બે સ્પેશિયલ પોલીસ ઓફિસર (SPO)ની ગોળી મારીને હત્યા કરવામાં આવી છે. બુધવારથી ગુમ થયેલા બાબી ચંદ (57) અને રશપાલ કુમાર (45)ના મૃતદેહ ગુરુવારે દચ્છન વિસ્તારના જંગલમાંથી મળી આવ્યા હતા.
મળતી માહિતી પ્રમાણે, કિશ્તવાડના દચ્છન વિસ્તારના કિયાર ગામમાં સ્થાનિક પોલીસના સ્પેશિયલ ઓપરેશન્સ ગ્રૂપ (SOG)માં તૈનાત બંને કર્મચારી બુધવારથી ગુમ હતા. તેઓ પોતાના કેમ્પમાંથી ધરના-મરવાહ સ્થિત સેનાની ચોકી તરફ જઈ રહ્યા હતા ત્યારે ગુમ થયા હતા. શરૂઆતમાં તેમના મોબાઇલ ફોન પર સંપર્ક થઈ શક્યો નહોતો અને બાદમાં ફોન સ્વિચ ઓફ થઈ ગયા હતા.
બંનેની શોધખોળ દરમિયાન ગુરુવારે દચ્છનના જંગલમાંથી તેમના મૃતદેહ મળી આવ્યા. સૂત્રોના જણાવ્યા અનુસાર, મૃતદેહ તેઓ જ્યાંથી ગુમ થયા હતા તે સ્થળથી આશરે બે કિલોમીટર દૂર મળી આવ્યા હતા. તેમના શરીર પર ગોળીઓનાં અનેક નિશાન જોવા મળ્યાં છે, પરંતુ તેમના હથિયારો મળ્યાં નથી.
હત્યામાં સામેલ હુમલાખોરોને શોધવા માટે કિશ્તવાડના ઊંચા પહાડી વિસ્તારો અને ગાઢ જંગલોમાં સર્ચ ઓપરેશન ઝડપી બનાવવામાં આવ્યું છે. ભારતીય સેના, જમ્મુ-કાશ્મીર પોલીસના SOG અને કેન્દ્રીય સુરક્ષા દળોની ટીમો આ અભિયાનમાં જોડાઈ છે. અગાઉ શોધખોળ માટે ડ્રોન અને સ્નિફર ડોગ્સની મદદ પણ લેવામાં આવી હતી. દુર્ગમ પહાડી રસ્તાઓ અને જંગલોમાં સુરક્ષા દળોએ ઘેરાબંધી કરીને તપાસનો વ્યાપ વધાર્યો છે.
કિશ્તવાડ જિલ્લો લાંબા સમયથી આતંકવાદ વિરોધી કામગીરીનું મહત્ત્વનું કેન્દ્ર રહ્યો છે, જ્યાં સુરક્ષા દળો સતત અભિયાનો ચલાવી રહ્યાં છે. આપેલી માહિતી મુજબ, વર્ષ 2026માં અત્યાર સુધીમાં આતંકવાદ સંબંધિત ઘટનાઓમાં કુલ પાંચ લોકોનાં મોત થયાં છે, જેમાં ચાર આતંકવાદીઓ અને એક જવાનનો સમાવેશ થાય છે.