દેશના ઓટોમોબાઇલ બજારમાં CNG અને ઇલેક્ટ્રિક વાહનોની માંગ ઝડપથી વધી છે. ઇંધણના વધતા ભાવ અને E20 પેટ્રોલ અંગે ચાલતી ચર્ચા વચ્ચે ગ્રાહકો CNG તરફ વધુ ઝુક્યા છે. ગયા મહિને કુલ કાર વેચાણમાં CNG અને ઇલેક્ટ્રિક વાહનોએ પેટ્રોલ કારને પાછળ છોડી દીધી હતી. આ માંગને ધ્યાનમાં રાખીને કિયા ઇન્ડિયાએ બે નવી 7-સીટર કાર — કિયા કેરેન્સ CNG અને કિયા કેરેન્સ ક્લેવિસ CNG — બજારમાં લોન્ચ કરી છે.
કંપનીએ થોડા દિવસ પહેલાં જ આ વાહનોનું પ્રી-બુકિંગ શરૂ કર્યું હતું.
કિયા કેરેન્સ CNG ફક્ત એક જ ટોપ-સ્પેક 'પ્રીમિયમ (O)' વેરિઅન્ટમાં મળશે, જેની એક્સ-શોરૂમ કિંમત ₹12.11 લાખ છે.
કિયા કેરેન્સ ક્લેવિસ CNG બે વેરિઅન્ટમાં આવી છે. બેઝિક HTE વેરિઅન્ટની કિંમત ₹12.39 લાખ છે, જ્યારે વધુ ફીચર્સવાળા HTE (O) વેરિઅન્ટની કિંમત ₹13.35 લાખ (એક્સ-શોરૂમ) છે.
બંને કારમાં 60 લિટરની CNG ટાંકી અને 45 લિટરની પેટ્રોલ ટાંકી આપવામાં આવી છે. લાંબી મુસાફરી માટે આ ડ્યુઅલ ટાંકી ઉપયોગી રહેશે. કંપનીના જણાવ્યા મુજબ મોટી CNG ટાંકી હોવા છતાં મુસાફરોની જગ્યામાં કોઈ કાપ મૂકવામાં આવ્યો નથી. ફૂલ-સાઇઝનું સ્પેર વ્હીલ (સ્ટેપની) કારની નીચે ફિટ કરવામાં આવ્યું છે, જેથી કટોકટીમાં ગ્રાહકને તકલીફ ન પડે.
એન્જિનની વાત કરીએ તો બંને CNG વેરિઅન્ટમાં 1.5 લિટરનું નેચરલી એસ્પિરેટેડ (NA) પેટ્રોલ એન્જિન આપવામાં આવ્યું છે.
CNG મોડમાં કાર 94.6 bhp પાવર અને 123 Nm પીક ટોર્ક જનરેટ કરે છે. પેટ્રોલ મોડમાં આ જ એન્જિન 113 bhp પાવર અને 143.8 Nm ટોર્ક આપે છે. હાલ આ બંને મોડેલ ફક્ત 6-સ્પીડ મેન્યુઅલ ગિયરબોક્સ (6MT) સાથે જ ઉપલબ્ધ છે.
CNG કિટથી કારનું વજન વધે છે, તેથી કંપનીએ બ્રેકિંગ સિસ્ટમ મજબૂત બનાવી છે. આગળના ટાયરોમાં 16-ઇંચના મોટા ડિસ્ક બ્રેક્સ આપવામાં આવ્યા છે. ખાડા-ટેકરાવાળા રસ્તાઓ પર આંચકા ન લાગે તે માટે સસ્પેન્શનમાં ફેરફાર (રી-ટ્યુનિંગ) કરવામાં આવ્યા છે. ડ્રાઇવિંગ અનુભવ સ્મૂધ રહે તે માટે એન્જિન રી-કેલિબ્રેટ કરાયું છે.
કારની કેબિનમાં ડેશબોર્ડ પર 'ફ્યુઅલ-ચેન્જ સ્વિચ' આપેલી છે, જેનાથી ડ્રાઇવર ચાલુ કારે પેટ્રોલમાંથી CNG મોડમાં ઇંધણ બદલી શકે છે. ડિજિટલ ઇન્સ્ટ્રુમેન્ટ ક્લસ્ટરમાં CNG માટે 'ડિસ્ટન્સ-ટુ-એમ્પ્ટી' (DTE) ડિસ્પ્લે પણ આપવામાં આવી છે, જે જણાવે છે કે બચેલા ઇંધણથી કાર કેટલું અંતર કાપી શકશે.
કંપનીએ આ કારની સત્તાવાર માઇલેજના આંકડા હજુ જાહેર કર્યા નથી. બજારના નિષ્ણાતોના અંદાજ મુજબ આ 7-સીટર કાર CNG પર 25 કિમી/કિગ્રા સુધીની માઇલેજ આપી શકે છે. મોટા પરિવાર માટે ઓછા ખર્ચે મુસાફરી કરવા માંગતા ગ્રાહકો માટે આ કાર વિકલ્પ બની શકે છે.