ભારતમાં 7-સીટર ફેમિલી કારની વાત નીકળે ત્યારે મારુતિ સુઝુકી એર્ટિગા લાંબા સમયથી લોકોની પહેલી પસંદ રહી છે. CNG સેગમેન્ટમાં એર્ટિગાનું વર્ચસ્વ રહ્યું છે. હવે કિયા ઈન્ડિયાએ આ સેગમેન્ટમાં પોતાની લોકપ્રિય MPV કેરેન્સ અને કેરેન્સ ક્લેવિસને ફેક્ટરી-ફિટેડ CNG વેરિઅન્ટ સાથે લોન્ચ કરી છે. તેની શરૂઆતની એક્સ-શોરૂમ કિંમત ₹12.11 લાખ છે, જે એર્ટિગા CNG સામે સીધી ટક્કર આપશે.
વેરિઅન્ટ અને કિંમત:
કિયા કેરેન્સ CNG ફક્ત 'પ્રીમિયમ O' વેરિઅન્ટમાં મળશે, જેની એક્સ-શોરૂમ કિંમત ₹12,11,800 છે.
કેરેન્સ ક્લેવિસ CNG HTE અને HTE O વેરિઅન્ટમાં મળશે. HTE બેઝ વેરિઅન્ટની કિંમત ₹12,38,800 અને HTE O ટોપ વેરિઅન્ટની કિંમત ₹13,34,800 (એક્સ-શોરૂમ) છે.
આ નવાં CNG મોડલ તેમના પેટ્રોલ વેરિઅન્ટ કરતાં લગભગ ₹99,000 થી ₹1,00,000 મોંઘાં છે.
એન્જિન, પાવર અને માઇલેજ:
બંને કારમાં કિયાનું 1.5-લિટર સ્માર્ટસ્ટ્રીમ નેચરલી એસ્પિરેટેડ પેટ્રોલ એન્જિન છે, જે 6-સ્પીડ મેન્યુઅલ ગિયરબોક્સ સાથે જોડાયેલું છે. CNG મોડમાં તે 96 PS પાવર અને 123 Nm ટોર્ક આપે છે. કારમાં 60-લિટરનો CNG સિલિન્ડર બૂટમાં નીચેની તરફ સુરક્ષિત રીતે લગાવવામાં આવ્યો છે. સિલિન્ડર હોવા છતાં સ્પેર વ્હીલ નીચે રાખવાની વ્યવસ્થા છે. કંપનીના દાવા મુજબ તે પ્રતિ કિલોગ્રામ 22 થી 25 કિલોમીટર માઇલેજ આપે છે.
આરામ અને સુરક્ષા:
CNG સિલિન્ડરના વધારાના વજનને સંતુલિત કરવા માટે સસ્પેન્શન ફરીથી ટ્યુન કરાયું છે અને આગળના વ્હીલ્સ પર 16-ઇંચની મોટી ડિસ્ક બ્રેક્સ આપી છે. ત્રીજી હરોળની સીટના રિક્લાઇન એંગલમાં પણ સુધારો કરાયો છે.
કેબિનમાં CNG-પેટ્રોલ ફ્યુઅલ સ્વિચ બટન અને 4.2-ઇંચનું ડિજિટલ TFT ઇન્સ્ટ્રુમેન્ટ ક્લસ્ટર છે, જેમાં CNG સંબંધિત માહિતી દેખાય છે. ડિજિટલ ઇન્ફોટેનમેન્ટ સ્ક્રીન, રિયર AC વેન્ટ્સ, 6 એરબેગ્સ, ABS અને તમામ વ્હીલ્સ પર ડિસ્ક બ્રેક્સ સ્ટાન્ડર્ડ છે.
એર્ટિગા માટે ચિંતાજનક કેમ?
મારુતિ એર્ટિગા CNG ₹10.94 લાખથી ₹12 લાખની કિંમત શ્રેણીમાં વેચાય છે. એર્ટિગા થોડી સસ્તી હોવા છતાં, કિયા કેરેન્સ વધુ સ્પેસ, વૈભવી કેબિન, સારી બિલ્ડ ગુણવત્તા અને 6-સ્પીડ ગિયરબોક્સ જેવી સુવિધાઓ આપે છે. જે પરિવારો સારી માઇલેજ સાથે લક્ઝરી અને આધુનિક ફીચર્સ ઇચ્છે છે, તેમના માટે નવી કિયા કેરેન્સ CNG પહેલી પસંદ બની શકે છે.