કેરળના ત્રિશૂર જિલ્લામાં શુક્રવારે મોડી રાત્રે એક ગંભીર અકસ્માત સર્જાયો હતો. કેપમંગલમ વિસ્તારના પનમ્બિકુનુ ખાતે ઊભેલી ટ્રકમાં કાર ઘૂસી જતાં 8 એન્જિનિયરિંગ વિદ્યાર્થીઓના મોત થયા હતા.
પોલીસના જણાવ્યા અનુસાર, આ તમામ વિદ્યાર્થીઓ તમિલનાડુના ડિંડીગુલની એક એન્જિનિયરિંગ કોલેજમાં ભણતા હતા. તેઓ ગુરુવાયુરથી કોડુંગલ્લુર જઈ રહ્યા હતા ત્યારે રાત્રે લગભગ 11:40 વાગ્યે આ અકસ્માત થયો.
અકસ્માત સમયે ટ્રક ઊભી હતી, પરંતુ કાર તેમાં જોરદાર ટક્કર મારતાં આ ઘટના બની. સ્થાનિક લોકોએ તાત્કાલિક બચાવ કામગીરી હાથ ધરી હતી, પરંતુ અકસ્માત એટલો ગંભીર હતો કે કોઈને બચાવી શકાયું નહીં.
મૃતકોની ઓળખ હજુ સત્તાવાર રીતે જાહેર કરવામાં આવી નથી. કારનું રજિસ્ટ્રેશન તમિલનાડુના મદુરાઈ જિલ્લાનું છે. પોલીસે ઘટનાસ્થળે પહોંચી તપાસ શરૂ કરી છે અને મૃતદેહોને પોસ્ટમોર્ટમ માટે મોકલ્યા છે.