બનાસકાંઠા જિલ્લાના જુનાડીસા વિસ્તારમાં નાઈટ સફારી પ્રોજેક્ટ માટેના માર્ગમાં આવતા 212 દબાણો હટાવવાનું નક્કી કરાયું છે. આ દબાણોને કારણે અસરગ્રસ્ત થતા 140 પરિવારોને નવું ગામતળ બનાવીને મફત પ્લોટ ફાળવવાની રાજ્ય સરકારે સત્તાવાર મંજૂરી આપી છે. આ માટે 1 હેક્ટર જમીન ફાળવવામાં આવી છે.
નાઈટ સફારી પ્રોજેક્ટના વિકાસ માટે વહીવટી તંત્રએ વિસ્તારમાં કુલ 212 ગેરકાયદે દબાણોની ઓળખ કરી હતી. આ દબાણો હટાવવાથી જે પરિવારો પ્રભાવિત થશે તેમને યોગ્ય આશ્રય મળી રહે તે માટે સરકારે તાત્કાલિક આયોજન કર્યું છે. આ પ્રક્રિયા અંતર્ગત અત્યાર સુધીમાં 178 અરજીઓ પ્રાપ્ત થઈ છે, જેમાંથી 140 પરિવારોની અરજીઓ ચકાસણી બાદ મંજૂર કરવામાં આવી છે. બાકીની 38 અરજીઓની ચકાસણી હાલ ચાલુ છે.
સરકારના આ નિર્ણયથી વિકાસ પ્રોજેક્ટને વેગ મળશે અને જરૂરિયાતમંદ પરિવારોને પોતાના કાયમી ઘરનું સ્વપ્ન સાકાર થશે તેમજ તેમનું જીવનસ્તર સુધરશે.