હિન્દી સિનેમામાં 1990ના દશકમાં રોમેન્ટિક હીરો તરીકે ઓળખ મેળવનાર અભિનેતા જુગલ હંસરાજનો જન્મ 26 જુલાઈ 1972ના રોજ થયો હતો. તેઓ અભિનેતા, લેખક અને ફિલ્મ નિર્માતા તરીકે પણ કામ કરી ચૂક્યા છે.
તેમણે બાળ કલાકાર તરીકે શેખર કપૂરની ફિલ્મ 'માસૂમ'થી કારકિર્દીની શરૂઆત કરી હતી. બાદમાં 'કર્મ' અને 'સલ્તનત' જેવી ફિલ્મોમાં પણ બાળ કલાકાર તરીકે કામ કર્યું. બાળપણમાં તેઓ ટેલિવિઝન અને પ્રિન્ટ જાહેરાતોમાં મોડેલ તરીકે પણ જોવા મળ્યા હતા.
1994માં 'આ ગલે લગ જા' ફિલ્મથી તેમણે મુખ્ય અભિનેતા તરીકે પ્રવેશ કર્યો. ત્યારબાદ 'મોહબ્બતેં', 'કભી ખુશી કભી ગમ' અને 'સલામ નમસ્તે' જેવી ફિલ્મોમાં તેમની ભૂમિકા રહી. 'મોહબ્બતેં'ને કારણે તેમને રોમેન્ટિક હીરો તરીકે ઓળખ મળી.
અભિનય ઉપરાંત તેમણે એનિમેટેડ ફિલ્મ 'રોડસાઇડ રોમિયો'માં લેખક અને દિગ્દર્શક તરીકે કામ કર્યું. વર્ષો બાદ તેમણે સૈફ અલી ખાનના પુત્ર ઇબ્રાહિમ અલી ખાન સાથેની ફિલ્મ 'નાદાનિયાં'માં પુનરાગમનનો પ્રયાસ કર્યો, પરંતુ ફિલ્મ સારો પ્રતિસાદ મેળવી શકી નહીં.
જુગલ હંસરાજ પૂર્વ ફર્સ્ટ-ક્લાસ ક્રિકેટર પ્રવીણ હંસરાજના નાના પુત્ર છે. પ્રવીણ હંસરાજનું 28 જાન્યુઆરી 2014ના રોજ અવસાન થયું હતું. જુગલના મોટા ભાઈનું નામ સુનિલ હંસરાજ છે, જ્યારે અભિનેતા ચેતન હંસરાજ તેમના પિતરાઈ ભાઈ છે.
જુલાઈ 2014માં તેમણે ન્યૂ યોર્કની એનઆરઆઈ ઇન્વેસ્ટમેન્ટ બેન્કર જાસ્મિન ધિલ્લોન સાથે લગ્ન કર્યા. દંપતીને સિદક નામનો પુત્ર છે. હાલમાં જુગલ હંસરાજ પરિવાર સાથે ન્યૂ યોર્કમાં રહે છે.
મીડિયા રિપોર્ટ્સ અનુસાર, અભિનયથી દૂર રહેવા છતાં તેમની આર્થિક સ્થિતિ સારી છે. તેમની અંદાજિત કુલ સંપત્તિ આશરે 37 કરોડ રૂપિયા હોવાનું કહેવાય છે, જે તેમણે બાંધકામ ઉદ્યોગમાં કરેલા કામ દ્વારા મેળવી હોવાનું જણાવાય છે.