ઉત્તરાખંડના ચમોલી જિલ્લામાં બદરીનાથથી પરત ફરી રહેલું હેલિકોપ્ટર જોશીમઠ નજીક દુર્ઘટનાગ્રસ્ત થયું છે. આ અકસ્માતમાં પાયલટ સહિત 6 લોકોના ઘટનાસ્થળે જ મોત થયા છે. ચમોલી પોલીસે આ ઘટનાની સત્તાવાર પુષ્ટિ કરી છે.
ઉત્તરાખંડ નાગરિક ઉડ્ડયન વિકાસ પ્રાધિકરણ (UCADA)એ તાત્કાલિક કાર્યવાહી કરીને ટ્રાન્સ ભારત એવિએશન કંપનીના તમામ હેલિકોપ્ટરની ઉડાન પર પ્રતિબંધ મૂક્યો છે અને સમગ્ર ફ્લીટને ગ્રાઉન્ડ કરવાનો આદેશ જારી કર્યો છે. આ ઉપરાંત ઘટનાની વિસ્તૃત તપાસના આદેશ પણ આપવામાં આવ્યા છે.
UCADAના ચીફ એક્ઝિક્યુટિવ ઓફિસર પ્રતીક જૈને આપેલી માહિતી મુજબ, ટ્રાન્સ ભારત એવિએશન પ્રાઇવેટ લિમિટેડનું હેલિકોપ્ટર (VT-HCX) બપોરે આશરે 1:14 વાગ્યે બદરીનાથથી દહેરાદૂનના સહસ્ત્રધારા જવા માટે રવાના થયું હતું. જોશીમઠ ખીણ પરથી પસાર થતી વખતે અચાનક એર ટ્રાફિક કંટ્રોલ સાથેનો તેનો સંપર્ક તૂટી ગયો હતો અને ટ્રેકિંગ સિસ્ટમ પરથી પણ તેનું લોકેશન ગાયબ થઈ ગયું હતું. ત્યારબાદ જોશીમઠ નજીક હાથી પહાડ પાછળ આવેલા ચાયી ગામ વિસ્તારમાં હેલિકોપ્ટર ક્રેશ થયું હોવાનું જાણમાં આવ્યું હતું.
દુર્ઘટનાગ્રસ્ત હેલિકોપ્ટરમાં પાયલટ કેપ્ટન હિમાંશુ સહિત કુલ 6 લોકો સવાર હતા. પેસેન્જર મેનિફેસ્ટ મુજબ અન્ય 5 મુસાફરોમાં પ્રતાપ, અરુણ, શંકર ગૌડા, સુધીર કે અને એચએસ નટરાજ સામેલ હતા. ચમોલી પોલીસ અને વહીવટી તંત્રની તપાસમાં પાયલટ સહિત તમામ મુસાફરોના મોતની પુષ્ટિ કરવામાં આવી છે.
ઘટનાની જાણ થતાં જ ચમોલી જિલ્લા વહીવટી તંત્ર, પોલીસ, એસડીઆરએફ (SDRF), સ્વાસ્થ્ય વિભાગ અને ભારતીય સેનાની ટુકડી તાત્કાલિક ઘટનાસ્થળે બચાવ કામગીરી માટે પહોંચી ગઈ હતી. વિસ્તારમાં સતત વરસાદ અને ગાઢ વાદળોના કારણે વિઝિબિલિટી ઘણી ઓછી હતી, જેથી રેસ્ક્યૂ ટીમોને ઘટનાસ્થળ શોધવામાં ભારે મુશ્કેલી પડી હતી.