ઉત્તરાખંડના જોશીમઠ નજીક શુક્રવારે બપોરે એક દુઃખદ હેલિકોપ્ટર અકસ્માત સર્જાયો હતો. બદ્રીનાથ ધામથી દેહરાદૂનના સહસ્ત્રધારા જઈ રહેલું 'ટ્રાન્સ ભારત એવિએશન પ્રાઇવેટ લિમિટેડ'નું એરબસ H125 હેલિકોપ્ટર (VT-HCX) ઉડાન ભર્યાની થોડી મિનિટોમાં જ ક્રેશ થઈ ગયું હતું. આ અકસ્માતમાં પાયલટ સહિત કુલ 6 લોકોના મોત થયા છે.
ઉત્તરાખંડ નાગરિક ઉડ્ડયન વિકાસ પ્રાધિકરણ (UCADA)ના જણાવ્યા અનુસાર, હેલિકોપ્ટરે શુક્રવારે બપોરે અંદાજે 1:14 વાગ્યે બદ્રીનાથથી ઉડાન ભરી હતી. ઉડાન ભર્યાના માત્ર 7થી 8 મિનિટ બાદ જોશીમઠ ઘાટી અને પાંડુકેશ્વર ગામ ઉપર ખરાબ હવામાનના કારણે રડાર સાથે તેનો સંપર્ક તૂટી ગયો હતો.
હેલિકોપ્ટરને કૅપ્ટન હિમાંશુ સભરવાલ ઉડાવી રહ્યા હતા. તેમની સાથે અરુણ સાલુંકે, એચ.એસ. નાગરાજા, પ્રતાપ બચ્ચીહલ્લી સિંગરાજન, સુધીર કે. અને શંકરગૌડા વી.બી. સવાર હતા. ઘટનાની જાણ થતાં જ ભારતીય સેના, ITBP, SDRF અને ચમોલી જિલ્લા વહીવટીતંત્રની ટીમોએ ઘટનાસ્થળે પહોંચીને તમામ 6 લોકોના મૃતદેહ રિકવર કરી લીધા છે.
આ દુર્ઘટના બાદ પૂર્વ મુખ્યમંત્રી હરીશ રાવતે શોક વ્યક્ત કરતાં રાજ્યમાં હેલિકોપ્ટર યાત્રાની સુરક્ષા પર સવાલો ઉઠાવ્યા છે. બીજી તરફ, UCADAએ ગંભીરતા દાખવતા 'ટ્રાન્સ ભારત એવિએશન પ્રાઇવેટ લિમિટેડ'ના તમામ હેલિકોપ્ટર્સની ઉડાન પર આગામી આદેશ સુધી તાત્કાલિક અસરથી રોક લગાવી દીધી છે.