રિલાયન્સ ઇન્ડસ્ટ્રીઝના ડિજિટલ વ્યવસાય જિયો પ્લેટફોર્મ્સે તેના આઈપીઓ માટે રેડ હેરિંગ પ્રોસ્પેક્ટસ (RHP) ફાઇલ કરી દીધું છે. આ જાહેર ભરણું 21 ઓક્ટોબરે સામાન્ય રોકાણકારો માટે ખુલશે અને 23 ઓક્ટોબર સુધી ચાલુ રહેશે.
કંપની 27 કરોડ નવા ઇક્વિટી શેર બહાર પાડશે, જેની ફેસ વેલ્યુ ₹10 છે. 14 ઓક્ટોબરે અમદાવાદ ખાતે ગુજરાતના રજિસ્ટ્રાર ઓફ કંપનીઝ (RoC) સમક્ષ RHP ફાઇલ કરવામાં આવ્યું. આ અંગે રિલાયન્સ ઇન્ડસ્ટ્રીઝે બીએસઈ અને એનએસઈને સત્તાવાર જાણ કરી છે.
એન્કર ઇન્વેસ્ટર્સ માટે બિડિંગ 19 ઓક્ટોબરે યોજાશે. કંપનીએ 19 જૂને સેબી સમક્ષ ડ્રાફ્ટ પેપર્સ (DRHP) રજૂ કર્યા હતા અને 28 ઓગસ્ટે સેબી તરફથી મંજૂરી મળી હતી.
કર્મચારીઓ અને શેરધારકો માટે કંપનીએ કુલ ₹3,000 કરોડના શેર અનામત રાખ્યા છે. જેમાં પાત્ર કર્મચારીઓ માટે ₹500 કરોડ અને રિલાયન્સ ઇન્ડસ્ટ્રીઝના લાયક શેરધારકો માટે ₹2,500 કરોડનો સમાવેશ થાય છે. આ લાભ 14 ઓક્ટોબર સુધી ડિમેટ ખાતામાં શેર ધરાવતા વ્યક્તિગત રોકાણકારો અને હિન્દુ અવિભાજિત પરિવારો (HUF) ને મળશે.
જિયો પ્લેટફોર્મ્સ રિલાયન્સ જિયોની ટેલિકોમ સેવાઓ અને ડિજિટલ એપ્લિકેશન્સનું સંચાલન કરે છે. ભારતના ડિજિટલ બજારમાં આ એક મહત્વનું લિસ્ટિંગ ગણાય છે. RHP દસ્તાવેજમાં કંપનીના નાણાકીય પરિણામો, જોખમો અને વિકાસની શક્યતાઓની વિગતો આપવામાં આવી છે, જેથી રોકાણકારો સમજીને નિર્ણય લઈ શકે.