રિલાયન્સ જિયોના IPOને લઈને રોકાણકારોમાં ઉત્સાહ છે. રોયટર્સના અહેવાલ મુજબ, આ IPO 21 ઓક્ટોબરે ખૂલી શકે છે. ગ્રે માર્કેટમાં પણ તેની સ્થિતિ મજબૂત છે. ઇન્વેસ્ટર્સ ગેઇનના રિપોર્ટ અનુસાર, ગ્રે માર્કેટમાં જિયોના IPOનું GMP 151 રૂપિયા પ્રતિ શેર સુધી પહોંચ્યું છે.
અહેવાલો અનુસાર, તાજેતરમાં કંપનીએ અમેરિકા, બ્રિટન, દુબઈ, સિંગાપોર અને હોંગકોંગમાં આકાશ અંબાણી અને ઈશા અંબાણીની આગેવાની હેઠળ રોડ શો કર્યો છે.
જિયોના IPOનું કદ 27,800 કરોડ રૂપિયાથી 37,000 કરોડ રૂપિયા સુધીનું હોઈ શકે છે. અહેવાલો મુજબ, આ ઇશ્યુ સંપૂર્ણપણે નવા શેરો પર આધારિત હશે. કંપની કુલ 27 કરોડ નવા શેર બહાર પાડી શકે છે.
જિયોના IPOની પ્રાઇસ બેન્ડ 1,350 રૂપિયાથી 1,450 રૂપિયા વચ્ચે હોઈ શકે છે. જો આવું થાય, તો લિસ્ટિંગ બાદ કંપનીનું મૂલ્યાંકન 12.40 લાખ કરોડથી 13.40 લાખ કરોડ રૂપિયા સુધી પહોંચી શકે છે. કંપનીનો લક્ષ્ય ઓક્ટોબરના અંતે અથવા નવેમ્બરની શરૂઆતમાં લિસ્ટિંગ કરવાનો છે.
સંભવિત સમયરેખા મુજબ:
એન્કર રોકાણકારો માટે IPO 19 ઓક્ટોબર, 2026ના રોજ ખૂલી શકે છે.
જિયો IPO 21 ઓક્ટોબરે ખૂલવાની શક્યતા છે.
રોકાણની છેલ્લી તારીખ 23 ઓક્ટોબર હોઈ શકે છે.
શેરની ફાળવણી 23 ઓક્ટોબર, 2026ના રોજ થઈ શકે છે.
લિસ્ટિંગ 28 ઓક્ટોબર, 2026ના રોજ થઈ શકે છે.
જોકે, આ તારીખો હજુ સંભવિત છે. કંપની તરફથી પ્રાઇસ બેન્ડ કે તારીખો અંગે કોઈ સત્તાવાર જાહેરાત કરવામાં આવી નથી. કંપની હાલમાં અંતિમ તૈયારીઓમાં વ્યસ્ત છે.
ચીનની બહાર જિયો 5G સેવા આપતી સૌથી મોટી કંપની છે. જૂન 2026 સુધીના આંકડા અનુસાર, કંપની પાસે કુલ 26.85 કરોડ ગ્રાહકો હતા, જે અમેરિકાની ટી-મોબાઇલના વર્તમાન ગ્રાહકો કરતાં લગભગ 1.5 ગણા વધારે છે. જિયો બાદ આ જ કંપનીનો નંબર આવે છે. જિયોના IPOને 28 ઓગસ્ટે સેબીની મંજૂરી મળી હતી. કંપનીએ ઓગસ્ટમાં DRHP ફાઇલ કર્યો હતો.
આ આશરે બે દાયકામાં રિલાયન્સ ગ્રુપની કોઈ કંપનીનો પ્રથમ IPO હશે. સાથે જ આ રિલાયન્સ ગ્રુપના કન્ઝ્યુમર-ફેસિંગ બિઝનેસનું પ્રથમ લિસ્ટિંગ હશે. આ પહેલાં 19 જૂને યોજાયેલી રિલાયન્સ ઇન્ડસ્ટ્રીઝની 49મી એન્યુઅલ જનરલ મીટિંગમાં રિલાયન્સના ચેરમેન મુકેશ અંબાણીએ ડ્રાફ્ટ રેડ હેરિંગ પ્રોસ્પેક્ટસ (DRHP)ને મંજૂરી મળ્યાની માહિતી આપી હતી.
જિયો પ્લેટફોર્મ્સનો આ પબ્લિક ઇશ્યૂ સંપૂર્ણપણે 'ફ્રેશ ઇશ્યૂ' હશે. તેમાં કોઈપણ વર્તમાન શેરધારક પોતાનો હિસ્સો વેચશે નહીં. એટલે કે IPOથી એકત્ર થયેલી સમગ્ર રકમ સીધી કંપની પાસે જશે.
કંપનીના DRHP અનુસાર, એકત્ર થયેલી રકમમાંથી આશરે 27,500 કરોડ રૂપિયાનો ઉપયોગ રિલાયન્સ જિયો ઇન્ફોકોમનું દેવું ચૂકવવા માટે કરવામાં આવશે. બાકીની રકમનો ઉપયોગ સામાન્ય કોર્પોરેટ કામગીરી માટે થશે, જે કુલ ઇશ્યૂ કદના મહત્તમ 25% સુધી મર્યાદિત રહેશે.
જિયો પ્લેટફોર્મ્સ હાલમાં દેશની સૌથી મોટી ટેલિકોમ ઓપરેટર છે. FY26ના અંત સુધીમાં કંપનીનો કુલ સબ્સ્ક્રાઇબર બેઝ 52.44 કરોડ હતો. એક વર્ષ પહેલાં FY25માં આ સંખ્યા 48.82 કરોડ હતી.
અંબાણીએ કહ્યું, “જિયોનું આ લિસ્ટિંગ સમગ્ર દુનિયાને બતાવશે કે ભારત વૈશ્વિક સ્તર, વૈશ્વિક ક્ષમતા અને વૈશ્વિક મૂલ્ય ધરાવતી ટેક્નોલોજી કંપનીઓ બનાવી શકે છે.” જિયો પ્લેટફોર્મ્સ રિલાયન્સની જ ટેક કંપની છે, જેનું મુખ્યમથક મુંબઈમાં છે.
ભારતમાં સૌથી મોટું મોબાઇલ નેટવર્ક ચલાવવાની સાથે આ કંપની વિશ્વની અન્ય ટેલિકોમ કંપનીઓને પણ અદ્યતન 5G સેવા અને ટેક્નોલોજી પૂરી પાડે છે. તેની પાસે 5G સંબંધિત તમામ જરૂરી સોફ્ટવેર, નેટવર્ક સેવાઓ અને AI ટૂલ્સ ઉપલબ્ધ છે.
આ ટેક્નોલોજીની મદદથી મોટી કંપનીઓ અને પ્રાઇવેટ નેટવર્ક્સ માટે 5Gનો ઉપયોગ કરવો ખૂબ સરળ બની જાય છે, જેને ઇન્ટરનેટ ક્લાઉડ પર પણ ચલાવી શકાય છે.
(નોંધ: આ રોકાણની સલાહ નથી. શેરબજાર જોખમોને આધીન છે. કોઈપણ રોકાણ કરતાં પહેલાં નિષ્ણાતોની સલાહ જરૂરથી લો.)