નાયરા એનર્જી બાદ હવે Jio-bpએ પણ પેટ્રોલ અને ડીઝલના ભાવમાં વધારો કર્યો છે. રિલાયન્સ ઇન્ડસ્ટ્રીઝ સમર્થિત Jio-bpએ પેટ્રોલની કિંમતમાં પ્રતિ લિટર ₹5 અને ડીઝલની કિંમતમાં પ્રતિ લિટર ₹3નો વધારો કર્યો છે. આ નવા દરો રવિવાર, 11 ઓક્ટોબરથી સવારે 6 વાગ્યાથી અમલમાં આવ્યા છે.
પશ્ચિમ એશિયામાં ચાલી રહેલા તણાવ અને હોર્મૂઝની ખાડીમાંથી ઓઇલ સપ્લાય પર પડેલી અસરને કારણે આંતરરાષ્ટ્રીય બજારમાં ક્રૂડ ઓઇલના ભાવમાં ભારે ઉછાળો આવ્યો છે. ગ્લોબલ માર્કેટમાં કાચા તેલના ભાવ ઊંચા રહેવાથી માર્કેટિંગ માર્જિન પર દબાણ વધ્યું છે, જેના કારણે ખાનગી કંપનીઓને ભાવ વધારવાની ફરજ પડી છે.
ઉલ્લેખનીય છે કે આ અગાઉ 3 ઓક્ટોબરે અન્ય ખાનગી ઓઇલ કંપની નાયરા એનર્જીએ પણ પેટ્રોલ-ડીઝલમાં આટલો જ ભાવવધારો કર્યો હતો.
વિવિધ રાજ્યોમાં નવા દરો:
ભાવ વધારા બાદ વિવિધ રાજ્યોમાં Jio-bpના આઉટલેટ્સ પર ઈંધણના ભાવ નીચે મુજબ જોવા મળી રહ્યા છે:
હરિયાણા: પેટ્રોલ આશરે ₹109.80 પ્રતિ લિટર અને ડીઝલ ₹97.75 પ્રતિ લિટરના ભાવે વેચાઈ રહ્યું છે.
પંજાબ: પેટ્રોલ આશરે ₹108.54 અને ડીઝલ ₹99.19 પ્રતિ લિટર છે.
રાજસ્થાન: સ્થાનિક ટેક્સના આધારે પેટ્રોલ ₹113.91 થી ₹117.65 અને ડીઝલ ₹97.15 થી ₹100.78 પ્રતિ લિટરની વચ્ચે ઉપલબ્ધ છે.
સરકારી કંપનીઓના ભાવ સ્થિર
એક તરફ ખાનગી રિટેલર્સ ભાવ વધારી રહ્યા છે, ત્યારે દેશની સરકારી ઓઇલ કંપનીઓ—ઇન્ડિયન ઓઇલ, બીપીસીએલ અને એચપીસીએલ દ્વારા હાલમાં રેગ્યુલર પેટ્રોલ અને ડીઝલની કિંમતોમાં કોઈ ફેરફાર કરવામાં આવ્યો નથી.
દિલ્હીમાં પેટ્રોલ ₹102.12 અને ડીઝલ ₹95.20 પ્રતિ લિટર છે, જ્યારે મુંબઈમાં પેટ્રોલ ₹111.21 અને ડીઝલ ₹97.83 પ્રતિ લિટરના ભાવે વેચાઈ રહ્યું છે. સરકારી કંપનીઓ દ્વારા ભાવ સ્થિર રાખવામાં આવતા અન્ય મેટ્રો શહેરોની સરખામણીમાં ગ્રાહકોને થોડી રાહત મળી છે, પરંતુ ખાનગી પંપો પર મોંઘવારીનો માર યથાવત છે.