સત્ય. સાહસ. સંકલ્પ.

જેન્સન હુઆંગની Nvidiaમાં વાપસીના સંકેત: ઇલોન મસ્ક સહિત ઉદ્યોગપતિઓનું સમર્થન

જેન્સન હુઆંગની Nvidiaમાં વાપસીના સંકેત: ઇલોન મસ્ક સહિત ઉદ્યોગપતિઓનું સમર્થન

વિશ્વની સૌથી મોટી AI ચિપ કંપની Nvidiaમાં ભૂતપૂર્વ CEO જેન્સન હુઆંગની વાપસીની ચર્ચા વચ્ચે ટેસ્લા અને સ્પેસએક્સના CEO ઇલોન મસ્ક સહિત સિલિકોન વેલીના અનેક ઉદ્યોગપતિઓએ તેમને ફરીથી CEO બનાવવાનું સમર્થન આપ્યું છે.

ફાઇનાન્શિયલ ટાઇમ્સના અહેવાલ મુજબ, હુઆંગે પોતાના નજીકના લોકો સાથે આ અંગે ચર્ચા કરી છે. સમર્થકો ઇચ્છે છે કે તેમને ફરીથી કંપનીની જવાબદારી સોંપવામાં આવે.

ગયા અઠવાડિયે જેન્સન હુઆંગના ત્રણ મહિલાઓ સાથે સંબંધો હોવાના અહેવાલો આવ્યા હતા. તેમણે ચીનની એલિસ હુઆંગ સાથે સંબંધ હોવાની વાત સ્વીકારી હતી અને 12 નવેમ્બરે CEO પદ પરથી રાજીનામું આપી દીધું હતું. બાદમાં Nvidiaની બે મહિલા કર્મચારીઓ સાથે પણ તેમના સંબંધો હોવાના અહેવાલો આવ્યા હતા. અમેરિકન એજન્સીઓને શંકા છે કે એલિસ ચીની જાસૂસ છે.

ઇલોન મસ્ક અને એપિક ગેમ્સના CEO ટિમ સ્વીનીએ પણ હુઆંગને પાછા લાવવાનું સમર્થન આપ્યું છે. કંપનીના અનેક કર્મચારીઓ પણ તેમની વાપસી ઇચ્છે છે.

Nvidiaમાં રોકાણ કરતી બે કંપનીઓએ બોર્ડને પત્ર લખ્યો છે. તેમના પ્રમુખ બ્રેડ ગેર્સ્ટનર અને ગેવિન બેકરનું કહેવું છે કે હુઆંગે કંપનીને ઘણી આગળ વધારી છે, તેથી બોર્ડે તેમને પાછા લાવવા વિચારવું જોઈએ.

ફાઇનાન્શિયલ ટાઇમ્સ મુજબ, હુઆંગના સમર્થકો મોટા ઉદ્યોગપતિઓનું જૂથ બનાવી રહ્યા છે, જે કંપનીના બોર્ડ અને વ્હાઇટ હાઉસ પાસેથી તેમની વાપસી માટે સમર્થન મેળવવાનો પ્રયાસ કરશે.

હુઆંગ સામે ત્રણ મહિલાઓ સાથે સંબંધોના આરોપો છે. પહેલો વિવાદ સિંગાપોરની કંપની મેગાસ્પીડની ભૂતપૂર્વ અધિકારી એલિસ હુઆંગ સાથે જોડાયેલો છે. ન્યૂયોર્ક ટાઇમ્સના અહેવાલ મુજબ, બંને ઘણી વખત મળ્યા હતા. એલિસ પર ચીનની ગુપ્તચર એજન્સી માટે કામ કરવાનો પણ આરોપ છે.

બીજો મામલો Nvidiaની હેલ્થકેર વાઇસ પ્રેસિડેન્ટ કિમ્બર્લી પોવેલ સાથે જોડાયેલો છે. ન્યૂયોર્ક ટાઇમ્સે સૂત્રોને ટાંકીને દાવો કર્યો હતો કે બંને વચ્ચે સંબંધ હતા. કિમ્બર્લી સીધી રીતે હુઆંગને રિપોર્ટ કરતી હતી. આ ઉપરાંત, રોઇટર્સે બે લોકોને ટાંકીને ત્રીજી મહિલા સાથે પણ હુઆંગના સંબંધો હોવાનો દાવો કર્યો હતો. તે Nvidiaની કર્મચારી હોવાનું જણાવાયું છે, જોકે તેમની ઓળખ જાહેર કરવામાં આવી નથી.

મીડિયા અહેવાલો અનુસાર Nvidiaના અધિકારીઓને કિમ્બર્લી અને જેન્સનના સંબંધો વિશે પહેલેથી જાણ હતી.

એલિસ સાથેના સંબંધોના સમાચાર સામે આવ્યા બાદ હુઆંગે કંપનીના કર્મચારીઓને સંદેશ મોકલ્યો હતો, જેમાં તેમણે સ્વીકાર્યું હતું કે તેઓ પોતાની પત્ની પ્રત્યે વફાદાર રહ્યા નહોતા. તેમણે લખ્યું હતું, 'મારા આ પગલાથી મારી પત્ની અને બાળકોને ભારે દુઃખ પહોંચ્યું છે. મને તેનો અફસોસ છે. તમારા સૌનો વિશ્વાસ જાળવી રાખવાની મારી જવાબદારી હતી, પરંતુ હું તેમાં નિષ્ફળ રહ્યો.'

આ પછી 12 નવેમ્બરે તેમણે CEO પદ છોડી દીધું હતું. જોકે, વોલ સ્ટ્રીટ જર્નલના અહેવાલમાં દાવો કરવામાં આવ્યો હતો કે તેમણે પોતે રાજીનામું આપ્યું નહોતું, પરંતુ કંપનીના બોર્ડે તેમને પદ પરથી હટાવવાનો નિર્ણય લીધો હતો.

ચીનની ગુપ્તચર એજન્સી સાથે જોડાયેલા હોવાના એલિસ હુઆંગ પર લાગેલા આરોપો બાદ અમેરિકાની તપાસ એજન્સીઓ પણ આ મામલાની તપાસ કરી રહી છે. તપાસમાં એ જાણવાનો પ્રયાસ થઈ રહ્યો છે કે શું એલિસે Nvidiaની અદ્યતન AI ચિપ્સ ચીન પહોંચાડી હતી અથવા હુઆંગ પાસેથી કંપનીની કોઈ ગુપ્ત માહિતી મેળવી હતી. અમેરિકાનું ન્યાય વિભાગ પણ એલિસ સાથે જોડાયેલા મામલાઓની તપાસ કરી રહ્યું છે. અમેરિકી સંસદે 18 નવેમ્બરે એલિસને બંધ બારણે યોજાનારી બેઠકમાં માહિતી આપવા માટે બોલાવ્યા છે. બીજી તરફ, Nvidiaનું બોર્ડ પણ પોતાના સ્તરે આ મામલાની તપાસ કરી રહ્યું છે.

અમેરિકાના નાણામંત્રી સ્કોટ બેસેન્ટે રવિવારે Nvidiaના નેતૃત્વમાં મોટા ફેરફારોની માગ કરી હતી. તેમણે કંપનીને એ પણ પૂછ્યું કે શું તેણે નકલી કંપનીઓ મારફતે અમેરિકાના નિકાસ નિયમોથી બચીને ચીનને પોતાની શક્તિશાળી AI ચિપ્સ વેચી હતી. બેસેન્ટનું કહેવું છે કે કંપનીએ સ્પષ્ટ કરવું જોઈએ કે તેણે અમેરિકાના નિકાસ નિયમોનું પાલન કર્યું હતું કે નહીં. તેમના મુજબ, આ મામલો હુઆંગના વ્યક્તિગત વિવાદ કરતાં પણ વધુ ગંભીર છે.